Glocale e digitale, una tzitadinàntzia linguìstica noa. Ses cursos gratùitos de sardu
.png)
Su sardu no est petzi memòria, ma un'istrumentu biu pro sos tempos presente e benidore de custu logu. Est pro custu chi s'Ufìtziu de sa limba sarda de s'Unione de sos Comunes de su Monte Arvu annùntziat s'aberta de sas iscritziones pro unu tziclu nou de cursos de formatzione, gratùitos, indiritzados a sos dipendentes de sa Pùblica amministratzione de sas 9 biddas e a totu sos tzitadinos.
S'initziativa pertocat sas comunidades de Thiniscole, Bitzi, Lodè, Lùvula, Onanie, Orune, Osidde, Pasada e Torpè e est parte de su programma regionale TuLiS (Tutela de sas limbas de Sardigna) pro su triènniu 2025-2027 (lege 482 de su 1999 e leges regionales 6 de su 2012 e 22 de su 2018).
Su pianu formativu “Glocale e digitale” movet dae sas notziones de base pro nche lòmpere a s’impreu ispetzialìsticu de sa limba:
Livellu base (dae s’11 de freàrgiu): 15 letziones online, cada mèrcuris a sas 6 de merie, in contu de Fonètica e de Ortografia, cunfrontende sas variedades locales e su sardu comune.
Livellu intermèdiu (a pustis de su primu e a custu collegadu): semper in videocunferèntzia, pro megiorare sas cumpetèntzias morfològicas (bidas in antis) e sintàticas.
Bator cursos avantzados (a pustis de sos primos duos e intro de s’atòngiu de su 2027): mòdulos in presèntzia in contu de Geostòria, Diritos e tzitadinàntzia, Economia locale e Informàtica.
Pro ite tocat a bi partetzipare?
Custos cursos non serbint ebbia pro torrare a iscobèrrere sas raighinas nostras, ma fintzas pro achirire cumpetèntzias cuncretas in unu mundu semper prus atentu a sas ispetzifitzidades culturales. Cun carchi vantàgiu:
Tzertificatziones linguìsticas: sos cursos punnant a frunire sa preparatzione netzessària pro sos esames de tzertificatzione de sa limba sarda. Unu tìtulu ufìtziale chi arrichit su curriculum e atestat sas cumpetèntzias pròpias.
Professionalidade in sa Pùblica amministratzione: pro sos dipendentes pùblicos sa connoschèntzia de su sardu serbit a nch’acurtziare s’utèntzia e a aplicare in forma curreta sas normativas chi avalorant s’identidade de su territòriu in sos servìtzios istitutzionales.
Innovatzione e digitale: Imparare a impreare su sardu in s'informàtica e in s'economia est sa mègius manera pro projetare sa limba in sos cuntestos produtivos de su presente.
Tzitadinàntzia ativa: Connòschere sos diritos nostros fintzas in limba sarda afortit sa cussèntzia tzìvica de sas comunidades.
Marca·ti·nche!
Est fàtzile a bi pigare parte. Pro su primu cursu chi comintzat s’11 de freàrgiu:
Imbia unu messàgiu WhatsApp a su nùmeru 389 8213416 presentende·ti e narende chi lu cheres sighire
As a retzire su link a unu mòdulu online chi deves compilare pro perfetzionare s’iscritzione.
Non ti la perdas custa ocasione
.jpg)
