A banda sa 'irgonza, a in antis cun sa limba sarda



In ocasione de sa Die internatzionale de sa limba materna amus fatu unu brincu a sas iscolas superiores de Thiniscole pro lis cunsignare, a sos istudiantes, su volantinu cun su testu chi sighit



A BANDA SA ‘IRGONZA

A IN ANTIS CHIN SA LIMBA SARDA


Pitzinnas e pitzinnos chi a custa iscola ‘enites pro connòschere e pro crèschere: retzite custu volantinu, e si bos andat bene achite·nde fentzas còpia pro sichire a lu difùndere.

Bos iscriimos in sardu ca su sardu est sa limba nostra e vois, chi sezis sa corte frorita de onzi domo, s’ispera manna de onzi bidda, su tempus venitore de sa Sardinna, tenites una responsabilitate manna. E azis a esser vois a la sarvare custa limba.

Unu cras - e b’at chie est travallande pro chi custu cras siat su prus a curtzu possìbile - amos a aer un’iscola cun sas matèrias insinzatas in sardu, cun sos libros de testu iscritos in sardu, cun sa tecnologia chi faeddat in sardu. Custa est sa punna: su sardu in iscola!

Ma già dae como podimos ‘acher sa parte nostra, in iscola, in domo, in totue. Comente? 

Provande a faeddare in sardu tra amicos, de cale si siat cosa (sas paràulas già las tzapamos); provande a lèzere sos libros de literatura iscritos in sardu o bortatos in sardu (già bi nd’at, petite a nois); petende a sos mastros bostros chi faeddant su sardu, de l’impreare in classe cando est possìbile; faeddande in sardu a babbos e mamas bostras e pretendende su matessi dae issos; provande a iscrìere (fentzas paca cosa ma a fitianu) chentze tìmere de bos faddire. E gai sichinde.

Sas limbas son prendas, prus nde connoschimos e mezus est. Prus nde connoschites e mezus est! E si in mesu de totu sas àteras chi faeddates e istudiates bi ponites in mesu fentzas su sardu, tando sezis dande unu contributu mannu a beru. Bos torramos gràssias! 



Ufìtziu de sa limba sarda 

de s’Unione de sos Comunes de su Monte Arvu


dae su lunis a sa chenàpura dae sas 8.30 a sa una in carrera de Isalle 1

tel. 0784 878648 e posta eletrònica: cultura.unionemontalbo@gmail.com

e in internet: montearvu.blogspot.com 

Post popolari in questo blog

Pasada - Ballos de Mes' Austu

Immagine
  Su 23 de austu b’at a èssere un'eventu chi tzèlebrat sa richesa de sas traditziones in s'ammajadore burgu de Pasada. Sa segunda editzione sua acasàgiat grupos minifolk bènnidos dae totu s'ìsula. Sa serada at a pigare vida cun un'isfilada in su tzentru istòricu, ue sos grupos ant a pònnere in mustra s'autentitzidade e sos colores de sos ballos traditzionales. A su tèrmine de s'isfilada, sos grupos ant a ballare in Pratza Belvedere, oferende un'ispetàculu de mùsica e ballu, unu donu a sa cultura e a sas raighinas de sa Sardigna. Sos grupos ant a èssere: Grupu Minifolk Pro Loco de Pasada Grupu Minifolk Oleri de Ovodda Grupu Minifolk San Larentu de Budoni Grupu Minifolk Sant'Antoni de Pàdua Lodè Grupu Minifolk Graziano Picoi de Buddusò Grupu Minifolk N. S. de Castro de Oschiri. Sa serada at a èssere presentada dae Francesco Spanu
Sighi a lèghere

Cursu de Limba Sarda in Thiniscole

Immagine
  S’Ufìtziu linguìsticu de su Monte Arvu organizat in Thiniscole, in sa Sala Consiliare de s’Unione, Carrera de Isalle, unu cursu de Limba Sarda. Dae su 8 de maju a su 10 de trìulas, cada mèrcuris a sas  chimbe de sero, b’ant a èssere deghe addòbbios cun proa finale in contu de fonologia, morfologia, sintassi e istòria de sa limba nostra. Su maistru at a èssere s’operadore de isportellu Mauro Piredda, espertu de limba sarda, giornalista e tradutore Pro si marcare tocat a imbiare una mail a cultura.unionemontalbo@gmail.com inditende: nùmene, sambenadu e nùmeru de telefoneddu pro sos cuntatos de grupu; Pro cada informatzione podes telefonare a su 0784 878648 internu 5, dae sas 8.30 a sas 13 onni die francu su sàbadu.
Sighi a lèghere