Uls e "Dialoghi con l'autore", una tradutzione dae "Cristallo" de Livia Sambrotta
De dae foras su Chalet Cristallo est un’imbòligu lughente de architetura avanguardìstica de bidru e de linna. A palas suas, che a una manu divina grae, su padente de abetes rujos malu a rugrare si nch’isterret finas a ue s’ogru non bi lompet. Su panorama chi si podet bìdere dae s’imbaru s’aberit longu longu sighende sas cristas dolomìticas vènetas intèssidas in sas àeras. In sa cadrija donosa de atzàrgiu nieddu galu bia est sa braja pro un’arrustida chi mai s’at a cumprire.
A sa una mancu deghe de su 15 de austu sa lughe soliana chi a parpu lompet lassinosa a su parquet de su chalet, colende dae sos muros de bidru, si nch’allargat refliti-refliti in su pamentu che a unu pojatzu. Chi faghende·si logu s’atopat cun un’àteru, de sàmbene, cun su lugore suo furriende·si a tanadu. Non diat pàrrere gasi isprammosu. Custu aiat pòdidu nàrrere Rachele, ammajada dae sos colores, riferende·si a su poderiu suo isperiadore e a sa mirada abbista de sa fotògrafa chi fiat. Petzi si l’aiat pòdida bìdere cussa mantza.
Istèrrida palas a chelu e cun sa conca girada a un’ala, Rachele no intendet prus nudda. Sos pòddighes de sas manos suas parent aferrende sos asses de su parquet che a sas farrancas de un’alarpu impagiadu. Fintzas sos pilos suos sunt girados a un’ala, lassende·li iscovecadu su tzugru fine, pro more de su cantzu de linna chi l’ant iscutu a conca e chi como pasat a costàgiu suo. Pagos minutos in antis fiat seghende a minudu sas patatas pro s’arrustida de Mesaustu. Como sa fotògrafa, priva de connoschèntzia e sena si sapire de sa carena sua, maretat ispaporada in s’iscuru.
A pagu tretu suo, Oliver est sètzidu in su pamentu. Su cadreatu de linna, bestidu in ecopelle arba unu tempus e como ruja in parte che a unu calendàriu de nadale, est a palas suas. Sa conca est abbandonada in sa petorra iscorriada, sas manos cupudas suta s’istòmagu, sas ancas tèteras, iscalabradas.
Sa lughe, in s’istèrrida màssima sua, como si nch’isparghet in totu sa sala donende rajos a un’àteru càdaru. Nemmancu a unu metru dae Oliver, Max pasat istochigiadu in prus partes afundende·nche in s’otomanu chi, modde, at abbrandadu sa ruta, islebiende su disacatu. Sa cara sua est mirende a tzentru de s’aposentu. Sestende una lìnia immaginària diamus pòdere nàrrere chi sos ogros bìdrinos suos fiant mirende a Rachele, a mugere sua.
In foras de su Chalet Cristallo su mudìmene est totale. A pagas chèntinas de metros, in un’ispèntumu, Andrea est firmu in cue, cun s’ischina truncada pro more de sa ruta subra de un’asprone de roca. Gùtios de sàmbene abbumbant su terrinu, pàsidos che lentore essende·nche dae una ferta aberta in su cùmeru mànchinu. Su sole atzesu nche lompet fintzas a subra suo, che chi mai.
In s’istrada asfaltada chi dae su Chalet Cristallo nche falat percossosa a su lagu, una vetura s’est isperrumada bolende pro chimbe metros in antis chi la firmaret unu truncu de abete ruju. In intro suo sa conca de Lana est ingurtida dae s’airbag e covecada dae sas ascras de bidru pròidas dae su parabrisa fatu a cantzos. Su sàmbene covecat parte manna de s’internu de sa màchina acorrischeddada. Nant chi sa pitzoca fiat fuende·si·nche. Nemos at a ischire nàrrere dae chie.
A sa una de Mesaustu, un’escursionista venetzianu tirende fotografias ammajadu dae su paesàgiu dolomìticu si sapit totinduna de sa carena de Andrea in un’iscolladòrgiu. Una bia dadu s’allarme, a pustis de 25 minutos, lompent sos de su sucursu alpinu e una vetura de sos carabineris. A sas duas mancu binti sa sentèntzia chi s’òmine est mortu.
Unu carabineri giòvanu, isetende su recùperu de sa carena cun s’elicòteru, disinnat de iscùdere un’ograda in cussos tretos pro averguare o mancu sa presèntzia de àteras vìtimas. Atiradu dae sa colunna de fumu de unu barbecue, si nch’acùrtziat a su Chalet Cristallo. Si nch’istat in cue pro un’scuta, ammajadu dae s’architetura etèrea de su fràigu chi si presentat che a unu gùtiu trasparente intre s’immensidade de sos montes. Faghet galu carchi passu e dae sos bidros, belle pensende de si faddire, bidet carchi carena arrematada. Sa manu nche falat a sa fundina de sa pistola sena bi pensare meda, su carabineri nde la bogat. De su restu est unu pitzocu ebbia.
Si nch’acùrtziat, e de dae foras cumprendet chi b’at duos òmines in mesu a unu lagu de sàmbene. Petzi cando intrat, cun sa manu manca treme-treme in sa manìllia de sa ghenna aberta e cun s’àtera in sa pistola, si sapit chi in su cugione de sa sala b’at una fèmina istèrrida. Tzichìrriat, narende carchi cosa; dat atentu a non catzigare sas mantzas emàticas e abarrat firmu che pedra osservende s’iscena intrea.
Deretu pigat su telefoneddu pro avisare a sos collegas ma una cramada l’antìtzipat. Su superiore suo l’avertet chi in s’istrada artziende·nche a su lagu una Fiat Panda niedda nch’est essida dae sa carregiada cun una pitzoca in intro. Baddu a l’ischire si est galu bia. A su carabineri giòvanu paret chi li manchet su terrinu suta. Unu dolore a costas li faghet tzèdere sos ghenugros. In cussa iscuta pretzisa Rachele aberit sos ogros.
