25 de santandria contra a sa violèntzia maschile. Comente naschet custa data

deretos immàgine

Oe, su 25 de santandria, est sa Die internatzionale pro s’eliminatzione de sa violèntzia contra a sas fèminas. Custa ricurrèntzia la connoschimus dae su 1999, cando s’assemblea generale des Natziones unidas l’istitueit.

Ma custa ricurrèntzia, dae ue movet? Su 1960, cun òrdine de su ditadore anticomunista dominicanu Rafael Trujillo, sa politzia segreta ochiet a tres sorres: Patria, Minerva e Maria Teresa Mirabal, mègius connotas comente “Las mariposas”.

Su babbu issoro fiat unu propietàriu terreri, duncas sa de sos Mirabal fiat una famìlia bene posta e bene piatzada in sa sotziedade de tando. Patria nascheit su 1924, Minerva duos annos a pustis e Maria Teresa su 36. Trujillo fiat a caddu dae su 1930 inaugurende unu regime opressivu e totalitàriu.

Regime chi issas ant comintzadu a cundennare a pustis de s’iscoberta de sa morte procurada a su babbu de una cumpàngia issoro de ideas non cunformes a su guvernu. Ma su momentu reale de comintzu de cuntierra intre “Las Mariposas” e Trujillo lu marcamus su 1949 cando chi, pro sa festa de San Cristobal, su ditadore inviteit sa famìlia in Salcedo. Est tando chi Minerva esponeit in pùblicu sas ideas suas.

Comintzant sos espròpios a dannu de sa famìlia e, in su mentres, sas sorres Mirabal si radicalizant fuindende, su 1960, su Movimiento Revolucionario 14 de Junio. Su riferimentu fiat a sa data de s’annu in antis, cando cun su sustegnu de Cuba, una pesada proeit a bortulare su regime.

Arrestadas prus bortas e posca iscapas, su 25 de santandria fiant torrende dae una bìsita issoro a sos maridos, fintzas issos in galera. Las firmeit sa politzia, dobbende·las finas a las mòrrere e posca ghetende·nche sa vetura sa vetura in unu trèmene pro simulare un’intzidente.

Nemos creeit a sa versione ufitziale e, cun cussa acontèssida comintzeit sa fine de su regime. Trujillo morgeit s’annu in fatu pro mèdiu de un’atentadu. Su 1962 sa Repùblica Dominicana connoschet sas primas eletzione lìberas, e totu custu fintzas gràtzias a su sacrifìtziu de sas sorres Mirabal.