Lodè - Laboratòriu de su pane pro connòschere s'aspetu antropològicu-culturale de s'abba

 

Sa Sardigna, cun sa rica cultura sua, istòria manna e ambiente ùnicu, est unu terrinu saliosu pro unu progetu de annestru ambientale chi intritzat antropologia e sas connoschèntzias locales. Cust’atzione, in intro de su progetu ABBA de su CEAS Montalbo de Lodè e de su Cumunu de Lodè,  mirat a sensibilizare sos partetzipantes de cantu importante est s'amparu de s'ambiente, avalorende sas traditziones e sos mitos ligados a s'abba, promovende pràticas de rispàrmiu ìdricu.

Compidare s'Antropologia culturale pro cumprèndere su raportu intre sas comunidades e sas risursas ìdricas e su significadu culturale de s'abba in sa sotziedade sarda: custa fiat sa punna. S'abba che a unu deretu umanu e cuntierras in contu de risursas ìdricas; pro more de s'antropologia podimus analizare galu de prus su ligàmene fungudu intre abba, cultura e istòria de sa Sardigna, cun una mirada cara a s'istùdiu de sos creìngios, de sas traditziones e de s'ispiritualidade sarda, chi ant plasmadu sa vida de sa populatzione locale.

Sos pitzinnos de Lodè, gràtzias a su personale de sa Ludoteca Cumonale, ant leadu parte a totu sas fases de sa panificazione, dae s'impastu a sa cota, alleghende mescamente de su chi pertocat s’ambiente, cun s’idea de los sensibilizare a s'impreu ratzionale de sa risursa “abba” .

A sighire, su personale de s'ufìtziu Limba e Cultura Sarda de s'Unione de sos Comunos de su Montalbo at arresonadu de s'aspetu antropològicu pro cumprèndere mègius sos ligàmenes intre produtos, terra, cultura e s'òmine, promovende su passàgiu intergeneratzionale de sas connoschèntzias.