Segundu cursu de sardu in Thiniscole. Marca·ti·nche inoghe!

 


Cun s’annualidade noa de s’Ufìtziu de sa limba sarda de s’Unione de sos Comunes de su Monte Arvu sunt torrados in Thiniscole sos cursos pro amparare su faeddu nostru e s'iscritura. 

A pustis de su primu, sessadu su beranu coladu, s'annualidade currente nde previdet un'àteru, pro chie si siat (est a nàrrere pro chie at fatu su primu, ma fintzas pro dischentes noos).

Sos argumentos de custu segundu cursu, a pustis de unu resumu de sas règulas ortogràficas istudiadas in antis, pertocant sos istiles de iscritura in sos cuntestos diferentes de sa comunicatzione (narratzione giornalìstica, aziendale, culturale, festiva, comunitària, poètica etc.).

Su dotzente est Mauro Piredda, giornalista, tradutore e operadore de isportellu cun tzertificatzione C1 in intro de su cuadru comune europeu de riferimentu in contu de connoschèntzias linguìsticas.

Custu segundu cursu (cun deghe addòbios, cada lunis a borta de die) comintzat su 25 de austu in sos locales de s'Unione, intrende dae carrera de Frumendosa.

Una borta chi amus sas adesiones comunicamus su calendàriu definitivu cun oràrios e argumentos.

Ambos duos cursos (su chi est fatu e su chi est de fàghere) sunt cunformes a sas leges 482/1999 (istatale) e 22/2018 (regionale) e sunt a s’indonu pro chie si siat. 

MARCA·TI·NCHE INOGHE

Post popolari in questo blog

Novas dae sa Regione: su Torpinu limba ufitziale de Sardigna!!!

Immagine
A pustis de sete annos dae s’adotzione de sa lege 22, sa Regione at comunicadu sos resurtos de sa commissione incarrigada pro definire su standard ortogràficu definitivu pro sa limba sarda. S’idea de sos cumponentes at bidu sa lughe in s’ùrtima setziada de su 29 de freàrgiu sighende sa punna de àere una limba prus mesana de sa Lsc atuale. Pro cussu est chi ant disinnadu de leare in cunsideru s’isoglossa de ‘Adu ‘e mesu, in tretos de Torpè. Seberadu duncas su torpinu comente standard iscritu. Inoghe sos documentos verbalizados.  
Sighi a lèghere

Versos in caminu

Immagine
  Su 21 de martzu est sa Die internatzionale de sa Poesia . Su grupu Pinna e Tinteri , in pare cun s’ Ufìtziu de sa limba sarda , semus organizende s'essida literària " Versos in caminu ". S'apuntamentu est pro chenàbura su 21 de martzu a borta de die in Thiniscole (luego amus a comunicare itineràriu e oràrios). Chie cheret podet dare s’ adesione sua ( intro de su 15 ) pro mèdiu de custu mòdulu inditende nùmene , sambenadu , nùmeru whatsapp , modalidade de partetzipatzione e, si benit a lèghere, tìtulu de sa poesia (si est cosa pròpia est mègius). S’ Ufìtziu de sa limba sarda abarrat a disponimentu via mail ( cultura.unionemontalbo@gmail.com ), telefonende a su 0784 878648 (internu 5) e in presèntzia (su lunis e sa chenàbura dae sas 9 a sas 13.30 in s' Unione de sos Comunes de su Monte Arvu - carrera de Frumendosa) pro cale si siat consulèntzia linguìstica e mètrica . E finas, s'in casu, pro isseberare paris sa poesia. Pro compilare su mòdulu inc...
Sighi a lèghere