Pulixi in Thiniscole, chenàbura su 23 s’ùrtimu romanzu suo “Il nido del corvo”

Pexels.com @Emily

S’assòtziu culturale Dialoghi con l'Autore, in collaboratzione cun sa Fondazione Farris -Tedde, sa Cartolibreria Giumar Multiservice, s'Unione de sos Comunes de su Monte Arvu (cun s’isportellu linguìsticu suo) e su grupu Ballos e Ammentos, presentat in Thiniscole su romanzu nou de Piergiorgio Pulixi, “Il nido del corvo”, imprentadu dae sos de Feltrinelli. In pare cun s’autore b’est Giuseppe Dalu chi, dimanda cun dimanda, nos nch’at a intrare - sena iscobiare meda - a s’istòria istèrrida dae s’iscritore sardu famadu in su gènere suo. Sas leturas las ant a fàghere Alessandra Contu de sa Fondazione Farris Tedde, Samantha Brau de Dialoghi con l’Autore e Roberta Olla de Ballos e Ammentos. In prus b’at a èssere sa letura in sardu de Laura Cara cun una parte traduida dae s’Ufìtziu de sa limba sarda. In su contu una giòvana isparesset sena lassare ormina peruna. Ma a pustis de ses meses de mudìmene su telefoneddu de Angela Floris est torra ativu. Est unu signale chi isporat e ponet pensamentos. In prus, in su logu de su rilevamentu, sos ispetores Daniel Corvo e Viola Zardi agatant fintzas una manu de fèmina. Pulixi, cun custa istòria, nos nche giughet a intro de unu noir psicològicu in ue ruent sas làcanas intre catzadores e predas. S’apuntamentu est pro chenàbura su 23 de ghennàrgiu a sas 8 de sero in sa Fondazione Farris-Tedde de Thiniscole in carrera de Tàtari 35.

mp