Sustegnu a sa natalidade. Fundos pro Bitzi, Lodè, Lùvula, Onanie, Orune, Osidde, Pasada, Torpè

 

Sa Regione sarda at postu resursas pro su triènniu 2026-2028 in contu de cuntrastu a s’ispopulamentu. Sa misura previdet s'erogatzione de contributos diretos pro cada fìgiu (nàschidu, adotadu o retzidu in afidamentu preadotivu) in favore de nùcleos familiares chi sèberant de istare in biddas chi non lompent a sos 5mìgia abitantes. Pro garantire sa continuidade de custu sustegnu sa Regione at autorizadu un’impignu de ispesa chi punnat a dare istabilidade e prospetivas a chie disinnat de formare o de fàghere crèschere in cue sa famìlia sua. Pro su 2026 s’istantziamentu est de 51,4 milliones; su matessi pro s’annu a pustis; 50 milliones pro su 2028. S'agevolatzione no est petzi pro sos residentes istòricos chi detzident de abarrare in bidda issoro, ma punnat a pònnere in parte fintzas a sos abitantes noos chi a cue si nche tramudant sa residèntzia. Petzi pro su primu annu b’at 320.570,82 èuros pro Bitzi, 163.002,11 èuros pro Lodè, 173.868,92 pro Lùvula, 54.334,04 èuros pro Onanie, 266.236,79 pro Orune, 27.167,02 èuros pro Osidde, 239.069,77 èuros pro Pasada e 369.471,46 èuros pro Torpè. Custos finantziamentos rapresentant petzi una parte de un’istrategia prus manna chi diat dèvere giuare contra a sa desertificatzione demogràfica. Diat èssere cosa ancora prus de giudu a ligare custas agevolatziones a s’imparu de sa limba sarda in sas domos, comintzende pròpiu dae su bàntzigu. Ponende in parte (mancari petzi pro sa cumponente linguìstica) fintzas sos Comunes prus mannos: Thiniscole nche bàrigat de meda sos 5mìgia.

mp