Cummissione Segunda, presentadu su pranu de polìtica linguìstica

Eris mangianu ant presentadu su pranu de polìtica linguìstica 2025 – 2029 pro su pàrre obbrigatòriu de s'assessora a sa Cultura Ilaria Portas, in sa cummissione Segunda, presidida dae Camilla Soru (Pd). 

Issa at ispiegadu chi sa Regione at a pònnere 3,7 milliones de èuro a su Pranu pro sa limba sarda pro more de sa lege regionale 22 de su 2018. 

Portas at signaladu “sa resessida manna de su bandu Imprentas, cun produtos editoriales de calidade chi ant ispartzinadu in su mundu sa limba sarda” e sa collaboratzione aviada “cun àteras Regiones de s'Ue chi tenent fintzas issas limbas minoritàrias”. 

At annuntziadu fintzas chi sa Regione at aviadu s'istandardizatzione ortogràfica de su tabarchinu (faeddadu in Carluforti e Cala Seda), mentras sunt valutende su problema de su precariadu de sos operadores de sos isportellos linguìsticos. 

De custu at faeddadu fintzas Antonio Ignazio Garau, in rapresentàntzia de 60 professionistas de su setore, signalende sa “netzessidade de sa rete de sos isportellos in su territòriu pro dare continuidade a su pranu linguìsticu”. Posca at agiuntu: “Tocat a formare sos insinnantes ca su sardu in s'iscola pùblica non b'est prus”. Pro Garau in prus andat  assegurada sa presèntzia de sos operadores linguìsticos de limba sarda in sos tribunales de s'Ìsula ca “b'at protzedimentos penales firmos pro cust'ausèntzia”. 

Franciscu Sedda (A Innantis!) at pedidu de adopiare s'istantziamentu de sa Regione in contu de limba sarda e at depositadu in cummissione unu testu integrativu de su pranu afirmende: “B'at una pertzetzione difùndida chi su sardu siat una limba epuru in sa pràtica si faeddat meda de prus s'italianu”. 

Pro Lorenzo Argiolas (“Sardigna mutit Sardigna”) “sa limba est impreada si est ùtile e creat oportunidade. Nois devimus fàghere a manera chi a
faeddare su sardu siat ùtile e vantagiosu, si chergiamus chi su sardu bivat e crescat”.