Bitzi, Onanie, Orune e Osidde. Publicadu s’avisu de su Plus de Nùgoro “Vita indipendente”

B’at unu momentu pretzisu chi una pessone sessat de s'intèndere petzi comente unu "ogetu de cura" pro devènnere su protagonista reale de s'esistèntzia pròpia. Est custu su coro de s'avisu pùblicu promòvidu dae su distretu sòtziu-sanitàriu Plus de Nùgoro, un'initziativa chi invitat a sos tzitadinos cun disabilidades pro chi torrent a leare in manu su timone de sa vida.

Su progetu est pro giòvanos e mannos chi cunvivent cun disafios fìsicos o psìchicos, cun edade dae sos 18 a sos 64 annos e residentes in unu de sos 20 comunes de su distretu (bator sos de s’Unione de su Monte Arvu: Bitzi, Onanie, Orune e Osidde). No est a retzire unu servìtziu de agiudu ebbia, ma a fraigare, in pare cun espertos, unu progetu globale de vida. Est un'invitu pro chie tenet disìgiu de cumpletare sos istùdios, de comintzare unu percursu professionale o de gestire sa cuotidianidade pròpia e sas responsabilidades genitoriales cun fortza e ànimu.

Sas possibilidades de atzione sunt mannas e tocant prus de un’aspetu de sa sotzialidade: dae su sustennu de un'assistente personale a s'isperimentatzione de formas abitativas noas comente s'housing sotziale e su co-housing, pensados pro chie bisat una domo pròpia e una vida de relatzione prus rica. B'at logu fintzas pro s'innovatzione, cun interventos de domòtica pro chi s'ambiente domèsticu siat prus funtzionale, e pro su trasportu sotziale, de agiudu mannu pro nche barigare sas barrieras chi lìmitant sos ispostamentos e s'integratzione in su tessutu de traballu e iscolàsticu.

Pro pigare parte a custu progetu, sos interessados ant tempus finas a su 20 de martzu pro presentare sa dimanda pròpia. Su percursu previdet una valutatzione dae parte de una cummissione multidisciplinare chi, movende de sas potentzialidades e de sos talentos de cadaunu, at a dare forma a pianos personalizados de sa durada màssima de trintases meses.

Est un'oportunidade pro nche brincare sas làcanas de s'autonomia personale e trasformare sas aspiratziones pròpias in una realidade fitiana fata de sèberos lìberos e cussentes.

Bae sa pàgina de su progetu: https://plusnuoro.it/misure/avviso-vita-indipendente/