Dae pees de Monte Arvu a s'Universidade. A pustis de sos cursos sas tzertificatziones



Su caminu conca a sa valorizatzione prena de su sardu lompet a traguardos noos. Cun gosu prus chi non mannu, s’isportellu linguìsticu de s'Unione de sos Comunes de su Monte Arvu annùntziat chi tres corsistas ant coladu  - in s’Universidade de Tàtari - sas proas iscritas e orales pro sa tzertificatzione linguìstica regionale de livellu B2.

Custu traguardu est su resurtadu de s’aficu issoro (b’at de lis torrare gràtzias mannas a Cosimo, a Franca e a Teresa) e de sa calidade de sos cursos ativados gràtzias a sos bandos TuLiS (LR 22/2018). In unu panorama ue mancant percursos ispetzìficos e calibrados conca a sos livellos de su QCER (su cuadru de riferimentu europeu pro sas limbas), custos cursos ant dimustradu chi una formatzione bene progetada e bene acumprida podet fàghere sa diferèntzia.

Sos dischentes, cun custos cursos, ant achiridu sas cumpetèntzias pro colare sas proas de
  • iscurtu e cumprensione de testos orales
  • cumprensione e anàlisi crìtica de testos iscritos
  • padronàntzia de sas istruturas comunicativas
  • produtzione iscrita e orale
Sa fortza de su progetu TuLiS est fintzas sa de ischire acollire un’utèntzia eterogènea in contu de cumpetèntzias (sos dischentes podent èssere new speakers, semi-speakers o passive speakers) e de diferèntzias diatòpicas, conca a un’impreu fàtzile, ispainadu e profetosu de sa limba nostra.

Ma su viàgiu non finit inoghe. Cando chi su cursu base de su 2026 est giai a belle metade de caminu, in custu beranu amus a abèrrere sas iscritziones pro su cursu intermèdiu. Est s'ocasione perfeta pro sos chi cherent megiorare sas cumpetèntzias issoro e pro chie cheret colare sas proas de sas sessiones imbenientes de tzertificatzione linguìstica.

Sos operadores de s’Ufìtziu sunt a disponimentu de sa comunidade.

Sa limba nostra est bia, afortiemus·la istudiende·la.

Su formadore TuLiS
Mauro Piredda

Post popolari in questo blog

Glocale e digitale, una tzitadinàntzia linguìstica noa. Ses cursos gratùitos de sardu

Immagine
  Su sardu no est petzi memòria, ma un'istrumentu biu pro sos tempos presente e benidore de custu logu. Est pro custu chi s'Ufìtziu de sa limba sarda de s'Unione de sos Comunes de su Monte Arvu annùntziat s'aberta de sas iscritziones pro unu tziclu nou de cursos de formatzione, gratùitos , indiritzados a sos dipendentes de sa Pùblica amministratzione de sas 9 biddas e a totu sos tzitadinos . S'initziativa pertocat sas comunidades de Thiniscole , Bitzi , Lodè , Lùvula , Onanie , Orune , Osidde , Pasada e Torpè e est parte de su programma regionale TuLiS (Tutela de sas limbas de Sardigna) pro su triènniu 2025-2027 (lege 482 de su 1999 e leges regionales 6 de su 2012 e 22 de su 2018). Su pianu formativu “ Glocale e digitale ” movet dae sas notziones de base pro nche lòmpere a s’impreu ispetzialìsticu de sa limba: Livellu base (dae s’11 de freàrgiu): 15 letziones online, cada mèrcuris a sas 6 de merie, in contu de Fonètica e de Ortografia , cunfrontende sas variedade...
Sighi a lèghere

Boghes in sa Foghe. In Santu Giuanne de Pasada sa Die internatzionale de sa Poesia

Immagine
  Su 21 de martzu est sa  Die internatzionale de sa Poesia . Su grupu  Pinna e Tinteri , in pare cun s’ Ufìtziu de sa limba sarda de su Montearvu , est organizende una serana literària de poesias a boghe arta. Sende chi s'incras est sa  Die internatzionale de s'Abba, su tema est pròpiu s'abba .  S’abba est la linfa de sa terra. Sa poesia est su respiru de s’ànima. Ambas current sena làcanas, ambas faeddant totu sas limbas, ambas apartenent a cada pòpulu.  S'apuntamentu est pro sàbadu su 21 de martzu a sas 17 in Santu Giuanne de Pasada (in su Ceas afaca a sa foghe). Chie cheret podet dare s’ adesione  sua ( intro e non prus a tardu de su 15 ) pro mèdiu de custu mòdulu inditende  nùmene ,  sambenadu ,  nùmeru   whatsapp ,  modalidade  de  partetzipatzione  e, si benit a lèghere,  tìtulu de sa poesia  (sua o de àtere).  S'eventu est abertu a totu sas persones de  cada natzionalidade . E...
Sighi a lèghere