Sos oràrios noos de sa Biblioteca de Thiniscole (e de sa Marina)

B'at unu logu in Thiniscole ue su tempus paret currende prus a bellu pro permìtere a su pensamentu de cùrrere prus lestru: est sa Biblioteca comunale "Grazia Deledda", su coro tzitadinu de su sistema bibliotecàriu urbanu. No est unu depòsitu de libros ebbia, ma unu presìdiu sotziale essentziale, un'ispàtziu ue sa comunidade s'agatat pro crèschere, pro istudiare e pro si cunfrontare.

Est inoghe chi òperant sas bibliotecàrias, figuras de primore chi, cun cumpetèntzia e aficu fitianu, frunint sas rispostas giustas a sos bisòngios de cada letore, trasformende cada rechesta in un'oportunidade de iscoberta.

Pro chi custu servìtziu siat galu prus a curtzu a sos tzitadinos, como chi est intrada s’ora legale, dae lunis su 30 de martzu sa vida culturale de sa tzitade at a sighire unu ritmu nou. In sa sede printzipale de Thiniscole sas ghennas s'aberint cada mangianu, dae su lunis a sa chenàbura, dae sas 9 a sas duas, oferende - in prus de su servìtziu de prèstidu - un'amparu seguru pro sas chircas premeridianas o s’immersione totale a pustis de s’ismùrgiu.

Sa vitalidade de sa biblioteca sighit pustis pràndidu, cando de sas 15.30 a sas 19 sas bibliotecàrias torrant a acollire s'utèntzia. Ma sa cultura non si firmat nemmancu su sàbadu a mangianu, garantende s'atzessu a sos servìtzios dae sas 9 a sa una.

In sa sede de sa fratzione marina de La Caletta sos oràrios los ant istudiados pro alternare cun echilìbriu sas aberturas: su lunis e su mèrcuris sa sede faghet oràriu prenu, acollende su pùblicu dae sas 9 a sas 14 e torra dae sas 15.30 a sas 19.

Sas àteras dies, sa flessibilidade est sa paràula crae: su martis e su giòvia su servìtziu est petzi a merie, dae sas 15.30 a sas 19, mentras sa chenàbura sa biblioteca cuntzentrat sas atividades suas petzi a banda de mangianu, dae sas 9 a sas duas.