Tenores in Bitzi, Lodè, Torpè e Thiniscole. Sos apuntamentos noos de su progetu Amparu

Su progetu Amparu est comintzadu s’11 de nadale, pròpiu in una bidda de s’Unione de sos Comunes de su Monte Arvu. Su die, in Lodè, ant fatu unu laboratòriu iscolàsticu in sas mèdias. Sos pitzocos, ghiados dae s’esperta Enedina Pau, ant pòdidu assìstere a una letzione de mùsica e de cultura de sa Sardigna. Una letzione particulare, sende chi sos òspites printzipales fiant sos cantores de su tenore Sant’Antoni, cun sas boghes issoro e cun sas armonias de sa poesia cantada.

Como custa caminera bi la sighint mèrcuris su 18 in Bitzi, semper in sas mèdias, in pare cun su tenore Romanzesu e s’etnomusicòlogu Bustianu Pilosu. S’iscummissa est manna: movende dae su mundu de s’iscola, custa initziativa est favorende sa crèschida pari-pari intre istrutzione e territòriu, aberende sas ghennas de sos istitutos a sa cultura poètica e musicale de sa comunidade e a sa limba sarda.

Ma sa de s’iscola no est s’ùnica lìnia de interventu de custu progetu finantziadu dae sa Regione Sardegna (L.R. 12/2025), atuadu dae s’Isre e postu a cùrrere dae su coordinamentu Campos de sas traditziones orales de Sardigna in sinergia cun sos assòtzios Tenores Sardigna e Boches a Tenore.

Amparu naschet difatis cun una punna crara: «Sa de atuare - narant - su Pianu de salvaguàrdia de su càntigu a tenore reconnotu dae s’Unesco comente Patrimòniu culturale immateriale de s’umanidade. Non sa de cungelare sa traditzione ma sa de nde garantire sa vitalidade in sos cuntestos suos de orìgine pro mèdiu de interventos chi sunt retzende atentzione e proas de resèssida mannas».

Un’àtera lìnia de interventu est sa de sas rassignas, pensadas comente momentos de cunfrontu intercomunitàriu pro nche barigare sos campanilismos e favorèssere s’iscàmbiu de pràticas bonas intre sos cantores de sas biddas. In programma pro sos logos nostros b’amus sa de Lodè, sàbadu su 14 a sas 19 in sos locales de Santu Juanne. In cue amus a pòdere bìdere e intèndere sos tenores locales Su Riscatu e Sant'Antoni in cumpangia de sos de Santa Maria de Otzana, Santa Rosulia de Benetuti e Sant'Elene de Durgali.

Posca b’est sa lìnia sa prus simbòlica, se da sas cantadas in sos tzilleris pro recuperare cussa dimensione sotziale e informale chi in sos sèculos at garantidu sa trasmissione orale de custa sièntzia. In tretos nostros ant a cantare in Torpè, chenàbura su 20 dae sas 19. Chie? Su tenore Romanzesu de Bitzi, su Padresu e sos cussertos locales Sant'Isidoro, Cùcuru 'e Luna, Sèlema e Torpinu. In ue? In sos tzilleris Pilosu, 3A e Ichnos.

Infines bi sunt sos laboratòrios comunitàrios pensados pro nch’acurtziare sos prus giòvanos a sa pràtica de su càntigu pro mèdiu de s’incontru diretu cun sos cantores espertos. De custos laboratòrios bi nd’at chimbe in Thiniscole (in sa Domo Tancale dae sas 19) cun su tenore Anticas Trassas Cando? Su 13, su 16, su 23, su 26 e su 28.

Amparu est lompende a sos concruos suos mustrende cantu su mundu de su càntigu a tenore est mannu, difusu e unidu. Custas sas àteras biddas de su progetu, dae cando est comintzadu su mese de nadale de s’annu coladu: Aidumajore, Alà, Benetuti, Biddamanna Strisàili, Bono, Bortigale, Busache, Garteddi, Golothene, Illorai, Irgoli, Lanusei, Lùvula, Mamujada, Norghiddo, Nule, Nùgoro, Ollollai, Orane, Orgòsolo, Orosei, Oroteddi, Orune, Otzana, Ovodda, Sarule, Sèneghe, Silanos, Sinnia, Tiesi, Ulìana e Urtei.