Tziclone Harry, comintzat su reconnoschimentu de sos dannos a sas segundas domos

A pustis de sos eventos meteorològicos chi ant interessadu su territòriu in ghennàrgiu, sunt aviadas sas protzeduras ufitziales pro su reconnoschimentu de sos dannos sufridos dae su patrimòniu privadu. S'initziativa sighit sa decraratzione de calamidade naturale decretada cun deliberatziones apòsitas de giunta comunale, e nch’est in intro de sa normativa definida dae sas ordinàntzias reghente de sa Protetzione tzivile, a livellu natzionale e regionale.

In custa fase ispetzìfica, sa possibilidade de presentare su reconnoschimentu de sos dannos est riservada petzi a sos propietàrios de immòbiles pro impreu abitativu chi non costituint sa residèntzia printzipale. Sa protzedura punnat a cuantificare s'entidade de sos dannos pro permìtere una gestione curreta de sos iter burocràticos imbenientes e de sos sustegnos econòmicos eventuales.

Pro semplificare s'achirimentu de sos datos e garantire sa trasparèntzia màssima, sa modalidade de imbiu est digitale ebbia. Sos tzitadinos interessados devent impreare su Sistema informativu de Protetzione tzivile colleghende·si a s'indiritzu web ufitziale de sa Regione Sardigna. S'atzessu a sa prataforma est permìtidu petzi pro mèdiu de identidade digitale, impreende sas credentziales Spid, sa carta de Identidade eletrònica (Cie) o sa carta natzionale de sos servìtzios (Cns).

Si racumandat sa puntualidade màssima inoltrende sa pràtica ca su tèrmine ùrtimu pro cumpletare sa protzedura informatizada est fissadu, sena dèrogas, a su 18 de martzu. Barigada cussa data, su portale no at a permìtere àteros inserimentos, serrende de su totu sa ventana pro custa torrada de reconnoschimentos.

Foto de Helena Jankovičová Kováčová (pexels.com)