Fèminas e tecnologia, su manifestu de Darya Majidi in Thiniscole

Sa de s'Istitutu "Luigi Oggiano" de Thiniscole fiat s’ùrtima data de sa missione sarda de Darya Majidi, imprendidora e ativista italo-iraniana, testimonial de su Progetu Margherita: unu giru chi at rugradu custos tretos non pro onorare ebbia sa memòria de Margherita Hack, ma pro semenare in sas generatziones noas su disìgiu de disafiare sos istereòtipos de gènere in sas carrieras Stem. In custu addòbiu finale, un’arresonanda riservada a sas istudiantes de s’istitutu thiniscolesu, Majidi at istèrridu sos cuntzetos de su paradigma suo de sas "6 C": cussèntzia, cultura, cumpetèntzias, coro, coràgiu e comunidade. «Non pongiais mente a chie bos narat chi sa tecnologia no est cosa chi bos cumpetet», at esortadu Majidi, sutaliniende comente s'intelligèntzia artifitziale potzat oe prenare su chi partzit sos istùdios umanìsticos dae sos tècnicos. De cada manera, su messàgiu cuntenet in intro un’ammonestu cuncretu: s'automatzione minetzat sos traballos cun valore bassu, chi pro su prus sunt ocupados dae fèminas. S'alfabetizatzione digitale est tando unu passaportu pro s'indipendèntzia e sa libertade. Su giru, sustentadu dae su Fundu pro sa Repùblica Digitale e gestidu dae Lariso e Formatica, at torradu a nàrrere s'importu de s'alleàntzia intre gèneres: pro mèdiu de s'islogan "He for She", Majidi at ammentadu chi sa de sa paridade no est una gherra isulada ma una trasformatzione culturale chi devet interessare sa sotziedade intrea.