Narrativa, su 25 in Thiniscole Ciriaco Offeddu cun sa presentada de "Angelina"

S'assòtziu “Dialoghi con l’autore” sighit su caminu suo in sa literadura cuntemporànea cun un'atòbiu nou in Thiniscole. Lunis su 25 de maju, a sas 7 de sero, sa biblioteca comunale “Grazia Deledda” de carrera de Roma at a ospitare s'iscritore Ciriaco Offeddu pro sa presentada de su romanzu nou suo “Angelina”, imprentadu dae sos de Bompiani. S'eventu cumbinat cun su comintzu de una collaboratzione noa cun s'assòtziu Istellas Events cun punnas de trasformare sos libros in ocasiones de àtòbiu, de meledu e de partetzipatzione ativa in su territòriu. A pustis de sa resèssida de “Istella mea”, Offeddu torrat a esplorare s'universu feminile ispinghende·si galu prus a fundu in s'indàgine chi pertocat su raportu intre tràuma, memòria e identidade. Ambientadu tra sa Sardigna de su pustisgherra e s'Itàlia cuntemporànea, “Angelina” est unu romanzu a duas boghes, commovente e umanu a fundu. Protagonistas sunt Assunta e sa fìgia Angelina. Assunta est una pitzinna chi, deretu a pustis de su cunflitu, est ogetu de violèntzia in domo e a ùndighi annos s’illierat ma partzende·si deretu dae sa criadura. Dae cussu mudìmene dolorosu naschent duas esistèntzias parallelas: una mama pitzinna chi rugrat s'otzèanu pro si nche fuire dae su passadu e una fìgia, crèschida in adotzione, cun unu bòidu malu a prenare. De totu custu, sena nd’iscobiare s’istòria intrea, nd’ant a faeddare s’autore matessi cun Samantha Brau e Antonio Amabile. S’intrada a s’eventu est a s’indonu e l’ant a ondrare sas leturas iscènicas contivigiadas dae Istellas Events, cun sas boghes de Vanessa Pipere, de Giovanni Piras e de Arianna Pedone.