Sas comunales in sas biddas de s’Unione de su Monte Arvu

Sa cramada eletorale de su 7 e e de s’8 de làmpadas at interessadu bator biddas de s'Unione de sos Comunes de su Monte Arvu cun novidades e duas cunfirmas. Sa novidade prus manna bi l’amus in Lodè, in ue b’at àpidu unu terremotu polìticu. Sa sìndiga uscente Antonella Canu, chi su 2020 nche l’aiant sètzida a pustis de una cursa in solitària, at pèrdidu contra a Gino Franco Ruiu chi at intertzetadu su disìgiu de cambiamentu de sa comunidade conchistende 675 preferèntzias, su 68,81% de sos votos. Canu s’est firmada a su 31,19% (306 votos). Custu “ribaltone” s’est acumpridu in unu cuntestu partetzipativu minimadu, cun s’afluèntzia falada dae su 62,53% de ses annos a como a su 59,84% de custu giru.

A s’imbesse sos resurtados de Osidde: fintzas como b’at àpidu una lista ebbia e sa cosa at permìtidu sa cunfirma de su sìndigu uscente Antonio Serafino Doneddu, premiadu fintzas dae un’afluèntzia prus arta de sa borta colada: dae su 66,85% a su 68,48%.

In Pasada sa frammentatzione polìtica at dadu vida a una cumpetitzione prus chi no inchesa, replichende su disafiu a tres listas giai bidu su 2020 e torrende a cramare a su votu su 68,37% de sos eletores, pagu prus de su 67,85% coladu. E fintzas custu giru at bìnchidu Salvatore Ruiu cun 786 votos (paris a su 40,33%); segundu Luigi Contu, firmu a su 32,27% cun 629 preferèntzias, e brunzu a Gianfranco Burrai, chi at serradu sa cursa cun su 27,40% de sos cunsensos (534 votos).

Ma sa batalla a s'ùrtima ischeda nos la contant dae Torpè, ue s'afluèntzia at registradu unu brincu a dae in antis de belle chimbe puntos, colende dae su 63,90% a su 68,24%. In unu panorama a bator listas, su sutzessore de Martino Sanna, presidente de custa Unione, est Gianni Pilosu chi s’at pigadu su tricolore a framucoddu pro una manada de votos. Pilosu at triunfadu cun 601 preferèntzias (34,25%) colende de pagu unu Marco Zirottu chi si l’at giogada otenende su 32,99% (579 votos). Prus in bassu sos àteros duos: Fabrizio Ladu cun su 26,15% de sos cunsensos (459 votos) e Alessandro Mulas serrende sa cursa cun su 6,61% (116 rughes).

Su cuadru finale de s'Unione torrat gasi duas amministratziones chi sèberant su caminu de sa continuidade gestionale e duos tzentros chi su preparant a bortare pàgina cun una ghia e echilìbrios polìticos noos.


https://www.pexels.com/it-it/foto/persona-caduta-di-carta-sulla-scatola-1550337/