"Sa Pratha 'e sa Limba", sa pratza de sa gente chi faeddat in sardu

Amus giutu sa limba “illi lóchi di la ‘jenti”, comente at naradu sa divulgadora gadduresa Mari Mameda su primu sero de “Sa Pratha ‘e sa limba”. In cue etotu su linguista Roberto Bolognesi at agiuntu chi sa limba nde l’amus “bogada dae su gheto”. E b’at chie comente su Prof. Augusto Secchi at faeddadu de “sèmene rivolutzionàriu”. Bi la diamus pòdere sighire cun sas paràulas galanas de totu sos àteros chi ant descritu a coro in manu custa initziativa chi comente Ufìtziu de sa limba sarda amus aprontadu in Thiniscole in pare cun s’assòtziu Istellas Events e cun sa Pro Loco. Ma est a la fàghere tropu longa. Fintzas ca sa pratza fiat prena onni sero (calicunu in mancu su primu) e in medas ant pòdidu manifestare su pensu issoro pro custa idea. Un’idea mìnima, si bi pensamus. Ma chi at funtzionadu. Sa comunidade, pighende·bi parte, at pensadu bene de si torrare a apropiare de duas cosas chi sunt parte de issa etotu: sa pratha e sa limba. Est duncas gràtzias a totu custa gente chi amus pòdidu iscumproare chi nudda est pèrdidu. In custa pratza amus bidu manneddas e manneddos betzos o mancu, criaduras chi las sunt pesende cun duas limbas, pitzocos chi ant pigadu su micròfonu binchende dudas e timòrias, istràngios chi faeddant in sardu e istràngios chi si sunt sapidos de lu pòdere cumprèndere, babbos e mamas chi ant ammìtidu de no àere pesadu a sos fìgios in sardu. In custa pratza amus bidu e intesu cantu dannu podet fàghere un’iscola monolìngue, e amus fintzas bidu e intesu cantu sa televisione apant contribuidu a italianizare, in parte, sa limba de sos mannos nostros. Ma, si cherimus, est fintzas custu su bellu de sa batalla chi amus disinnadu de fàghere. Si totu cantos aerent faeddadu (e faeddadu bene) sa limba nostra, forsis no aìamus àpidu bisòngiu nen de Ufìtzios linguìsticos nen de initziativas che a custa. Su caminu est galu longu e pro sardizare una comunidade non bastat a sardizare una pratza pro chimbe dies. Tocat a sardizare s’economia, sa pùblica amministratzione, sos servìtzios, sas atividades lùdicas, sas festas, sa liturgia. Semus petzi comintzende. Custas pagas rigas sunt petzi pro torrare gràtzias a totu sas fèminas e sos òmines de “Sa Pratha ‘e sa Limba”.