Su sardu est una festa. Festemus in sardu!

Lìtera aberta a sos comitados, a sas levas e a sos assòtzios de sas biddas de su territòriu

Comitados, levas, assòtzios e tzitadinos de s’Unione de sos Comunes de su Monte Arvu.

Totu sas bortas chi organizamus una festa o un’apuntamentu culturale, non semus petzi creende momentos cumpartzidos: semus dende boghe a sas raighinas nostras. E cale boghe est prus autèntica de sa limba nostra?

Su sardu retumbat in sas pratzas e in sos pensamentos nostros, ma cando tocat a lu pònnere iscritu in una locandina, in unu manifestu, in unu programma o in unu post social, carchi duda podet nàschere. 

• Comente si iscriet custa paràula?
• Cando est chi bi cheret s’atzentu?
• Custa cunsonante dòpia cheret o mancu?
• Comente rispetare paris sa faeddada de sa bidda e sas règulas generales de iscritura?
• Cale forma sintàtica est mègius?

Est fintzas pro custu chi b’est s’Ufìtziu de sa limba sarda, ativu in sa sede de s’Unione de sos Comunes de su Monte Arvu, in Thiniscole, e cun cumpetèntzias fintzas in sas àteras 8 biddas (Bitzi, Lodè, Lùvula, Onanie, Orune, Osidde, Pasada e Torpè).

S’obietivu nostru est su de dare sa dignidade giusta a sa limba nostra fintzas in sa forma iscrita (gasi comente bi la damus in italianu cando evitamus sos errores). S’Ufìtziu oferit agiudu gratùitu pro 

• Contivigiare sa beste gràfica e linguìstica de sos eventos bostros (locandinas, brochure etc)

• Iscrìere post e comunicados social craros e eficatzes

• Valorizare sa variedade locale de cada bidda (cando non si cheret impreare sa forma standard) integrende·la a perfetzione cun sas normas de su Repertòriu grafemàticu regionale. Custu nos permitet de rispetare sa manera locale sighende in su matessi tempus sas règulas ortogràficas cumpartzidas e giustas.

Iscrìere in sardu in forma curreta no est un’esertzìtziu iscolàsticu: est un’atu de rispetu pro sa cultura nostra e sa mègius presentatzione pro chie si siat legat sos programmas nostros. Una locandina iscrita in sardu e iscrita bene donat galu prus ondras a s’eventu nostru.

Colade a Ufìtziu o cuntatade·nos (telefonende a su 0784 878648 internu 5 o via mail a cultura.unionemontalbo@gmail.com), imbiade·nos sos botzetos bostros in antis de los imprentare o de los publicare in rete o in sos social.

S’Ufìtziu de sa limba sarda est sa domo de totu sos assòtzios e de totu sos comitados de su territòriu: traballemus paris pro sa limba nostra!