Sant’Antoni de su fogu in sas noe biddas de su Monte Arvu

 

Sant’Antoni de su fogu. Est a nàrrere sa prima festa comunitària de cada annu nou chi ruet fatu-fatu a sa lòmpida de sos Tres Res e chi antìtzipat sos tempos de carrasegare e de sa carèsima. Nuscos, sabores e colores inchesos caraterizant sas dies de sas biddas chi repitint su rituale de màdrighe pagana e agrària movende dae su fogu, elementu de nàschida a nou de sa vida. In custu biàgiu curtzu in sas noe biddas de s’Unione de sos Comunes de su Monte Arvu amus a collire su chi b’at a cumone e carchi diferèntzia proende a dare una visione coerente de custas manifestatziones chi a bortas sunt semper che pare e a borta mudant in pare cun su tempus. 

1) Bitzi 

In Bitzi faghent duos fogos. Unu in pratza ‘e Marcatu e unu in su bighinadu de Goreai. Sas suas entidades, mancari parte de su matessi Comune, est comente chi tèngiant una dimensione pròpia a su puntu de intèndere gente narende de andare «a Bitzi», dae Goreai, o a s’imbesse. Semper e cando sa domìniga in antis dae bidda nche tzucant a su sartu pro collire e “sa sepe”, chi l’ant a assentare su 16 a mangianu. Su sero b’est sa missa, su pèsperu, cun a pustis su giru de su santu e sos pitzocos chi àrtziant a cùcuru pro nde falare su cogone, su porcheddu e s’arantzu. In Bitzi cada annu tirant a sorte 20 persones intre sos Antoni, pro chi s’organizet sa festa. In Goreai tres.

2) Lodè

Si sas dies in antis de sa festa b’at chie nche giughent a peatzedda “sa pompia”, (unu truncu de ocalitu artu 20/25 metros), su 16 a mangianu sas cumpangias de pitzinnos essint a collire frasca (aliderru, mudregu, lidone ecc). E si sas fèminas istant in domo ammanitzende sos donos pro sos pitzinnos chi, dae mesudie, bi andant dimandende “Tzia, a lu zumpamos su ‘ocu?”, sos òmines mannos abbarrant in sa peatzedda cumbidende binu a sos chi torrant cun sa frasca dende·lis una ghetada de manos pro cumpònnere su ”pennetu de Sant’Antoni” a inghìriu de sa pompia. A sero, missa de pesperu essende, cumpridos sos tres giros de su santu a inghìriu de su fogu allutu dae parte de est, de sud e de ovest, comintzat sa gara de sos pitzinnos pro nch’artziare a punta de su truncu, in ue b’ant postu una ghirlanda de arantzos, una de calistros (su pane de sa festa) e una bustedda. A su chi nde la falat nche lu leant a gropa a canònica: su prèideru leghet sos donos chi su binchidore e sa cumpangia sua depent ritirare dae sos chi sunt in prumissa pro ammanitzare a pustis una chena pro totu sa bidda.

3) Lùvula

In Lùvula su fogu lu faghent in pratza de Rosa Luxemburg, cun su prèideru e sos fideles chi arribant dae crèsia pro sos giros a inghìriu de “Su Punteddu” e pro sa beneditzione. Sa particularidade de custa bidda est chi b’at duos comitados, cun su de sa crèsia chi aprontat su cocone e s’arantzata pro sos malaìdos, s’àteru pro totu sa comunidade chi atopat a s’apuntamentu de sa vìgilia a pratza. Fintzas inoghe b’est “Su Punteddu”, cun sos pitzocos chi, a fogu abbassende·si, devent artziare a subra pro nde falare "Sa Panata".

4) Onanie

In Onanie su fogu, “Sa ‘Uchina”, lu faghent in carrera de Funtana Manna. Fintzas in custa bidda àrtziant unu punteddu pro chi, una borta minimadu su fogu, sos pitzocos potzant lòmpere a cùcuru pro nde falare su prèmiu. Su palu est untadu comente in Lùvula. Sos organizadores de sa festa, tres, sunt tirados a sorte dae una lista.  

5) Orune

In Orune su fogu l’aprontant in pratza de Santu Bennardu (in ue unu tempus bi fiat una crèsia) sos de su comitadu de “Su Càrminu”. In ue b’at fintzas un’istrutura fata aposta pro bi fàghere “Su Punteddu” de Sant’Antoni. Non b’at in Orune una traditzione manna de fogos comente in Baronia, ma est beru chi sa funtzione l’ant semper fata, cun sa missa de sa vigìlia e sa professone dae sa crèsia de Santa Maria finas sa linna (truncos e frascas) de allùghere. Pro s’ocasione si faghet “Su pane de Sant’Antoni”, ma est dae ocannu chi b’at a èssere finamentas sa chena pro totu cantos. Singiale chi sa traditzione si podet finas afortire cun su tempus chi colat.

6) Osidde

In Osidde su fogu lu faghiant. Tocat a impreare su passadu imperfetu ca fintzas sas traditziones sufrint sas cunsighèntzias de s’ispopulamentu. Sa bidda est sa prus minore de sa Provìntzia cun nemmancu 250 abitantes. Custa cosa impedit finamentas unu ricàmbiu in sos organizadores chi, de custa manera, diant pòdere èssere semper sos matessi. Duncas, mancari unos 25 annos a como apant fatu in Osidde una pratza de Sant’Antoni, finamentas atretzada pro su fogarone, est dae tempus chi de fogu non nd’inchendent prus. Cando lu faghiant fiat de truncos, de raighinas e de cotzighinas, cun totu su rituale religiosu de sa missa pesperina de sa vigìlia e de sos tres giros de su santu in professone. Un’àtera cosa chi s’est perdende, in pare cun su fogu, est sa de s’intregu de su pane de Sant’Antoni, unu cogone in parte durche e tìpicu de cussa die de festa. Tando unas cantas famìlias, in forma de promissa, aprontaiant su pane pro lu dare a totu sa bidda. Como, emmo, b’at chie lu sighit a fàghere donende·lu, ma in forma minore a sos familiares prus custrintos e a sos amigos ìntimos.

7) Pasada

In Pasada, a concruos de sa chida in antis de sa de sa vìgilia de Sant’Antoni, sas cumpangias essint a “Su Mudregu” pro nche l’assentare in una pratzita a curtzu de sa crèsia de Santa Lughia. In antis su logu seberadu pro impostare sa frasca collida dae sos sartos  fiat sa zona de “Coghefae”. Est capatze inoghe puru de bìdere carros isfilende conca a su logu de s’assentu de sa linna, ma sa cosa est meda prus ispontànea de àteros logos. B’at unu comitadu chi si ocupat de su falò e chi, in pare cun sa parròchia, cuncordat su rituale in pare cun sa funtzione religiosa de sa vigìlia. E, a pustis de sa missa, sas frascas sunt allutas pro onorare su santu pro chi su tempus beranile torret cun vida noa e bundante in sos sartos. Non mancant sas persones chi in Pasada faghent sas prumissas: pro custa ocasione b’at chie preparat sos cogoneddos e s’arantzata pro los intregare a sos chi su 16 atopant a su fogu beneitu.

8) Thiniscole

In Thiniscole (ma fintzas in Sa Marina) totu comintzat cun sas dies de “Su Ramasinu”. Su sàbadu de sa chida in antis (o de duas chidas in antis, si b’at pagas dies a su 16) sas cumpangias essint a collire sas frascas (unu tempus fiant pròpiu de ramasinu ebbia) pro nche las giùghere, s’in cras a meria, a pratza de Sant’Antoni in tratore. Sos mezos colant peri sa bidda ondrados de arantzu e de peddes de angiones e cun binu de ofèrrere a sos chi atopant a custa professone. In pratza bi sunt sos de su prioradu chi colant cun canistros prenos de Pistiddu, su durche de su logu ammaniadu pro custas dies cun sa idanda chi lassat in buca sos tastos de mele e arantzu. Su 16, su die de su ‘Olone, a pustis de sa missa de sa vigìlia e de sos tres giros de sa “mazine” a inghìriu de sas frascas, sos pitzocos artziant a cùcuru de sa pira in pessu alluta pro nde falare sa rughe ondrada de arantzu e su porcheddu. Su die de sa vigìlia cumbinat cun sa prima essida de sa carotza de s’Orcu de Montiarvu in pare cun sas de su Guardianu, de su Tintinnatu, de su Voe Jacu e de sa Partorja.

9) Torpè

Si in Thiniscole ant mantesu su nùmene de su Ramasinu, in Torpè no li narant prus sa Sèlema, ca a su presente no est cussa sa chi collint. Sa Frasca est sa chi nche ponent in sos carros de sos tratores “carrigados a nae”. E a forma de nae est chi su 16 sos carros atraessant sa bidda pro nche lòmpere a pratza (in tretos de su tzentru polivalente) pro inchèndere su Fogulone. Sa festa est mudada in su tempus: sunt diferentes sas frascas collidas e sos mèdios pro nche la tòddere dae sos sartos; sunt cambiados sos organizadores (finas a sos annos 70 b’aiat chie si leaiat s’incàrrigu de organizare sa festa cumbidende sa gente in domo sua); fintzas a sos primos annos ‘70 sos pitzinnos artziaiant a cùcuru de sa sas frascas ammuntonadas in ue bi fiat sa rughe cun s’arantzu e fintzas petza e sartitza. Su fogu abbarrat comente elementu tzentrale (su preìderu in professone lu beneighet a missa essida), ma si podet nàrrere chi oe Sant’Antoni in Torpè est politzèntricu, sende chi contat finamentas sa bellesa de sas “naes” e sa punna de sas cumpangias a fàghere su carru prus galanu.