Novas, contos e cuentos

  Sas chidas coladas Videolina e su diretore suo, Emanuele Dessì, ant bisidadu a Pasada, pro nch’iscobèrrere giassos, personas e aziendas de primore. Domìniga sa televisione sarda prus nòdida, in sa trasmissione “Sardegna Verde”, at ammustradu  logos de ammaju, prenos de richesas archeològicas, che a su Casteddu de sa Fae, de bellesas naturales che a sas zonas ùmidas de su Parcu de Tepilora e de produtos locales chi dant galu de prus valore a custu bicu de Sardigna. Pro bìdere sa trasmissione totu intrea incarca inoghe

  Sas dies coladas sos pitzinnos de sa Ludoteca Comunale de Lodè sunt mòvidu a Pasada pro una de sas fainas de su progetu " Sos Ceas pro su Parcu" finantziadu dae su Parcu de Tepilora. Sos pitzinnos, acumpangiados dae su personale de su CEAS de Lodè e ghiados dae su personale de  sa “Casa delle Dame” de Pasada, ant bisitadu sos istagnos Longu e Tundu e ant àpidu manera de connòschere e ammirare unas cantas genias de animales chi bivent in sas zonas ùmidas.  Sa die est sighida in sos locales de su CEAS de Pasada, in ue issos ant pòdidu connòschere mègius sos animales pro mèdiu de imàgines e acrarimentos de su personale de su CEAS, pro cròmpere a pustis a realizare pubas de pugiones presentes in su territòriu. Sos pitzinnos ant concruidu s’essida tastende sos durches e sos produtos locales de Lodè, ammanitzados dae s’Azienda Agriturìstica “Su Cunzatu de Vitale” de Loredana Contu

  A su Comunu de Lodè est arribbada sa màchina achistada cun sas risursas de s'Unione de sos Comunos de su Monte Arvu; nde sunt istadas leadas àteras duas chi ant a arribbare intre de pagu tempus.