Bitzi - Contra a sa gherra

 COMUNICATU DE IMPRENTA


Sa Sotziedade Culturale Sinnos e sa Domo Cumonale de Bitzi, chin sa collaboratzione de sas Sotziedades Culturales Bitzichesas inàgurant su 25 de maju 2024 a sas 19,00, in su ‘ichinatu de Sant'Anghelu in Via Tirso, sa pintura murale dedicata a sa poetessa Efisina de Grimenta, (1866-1945).


Sa manifestatzione de su 25 de maju, intitulata “CONTRA A SA GHERRA" est sa concrusione de unu progettu de pintura murale pensatu e magonitu dae Diegu Asproni, chin s'azudu de sa Sotziedade Sinnos, s'apozu de sa Domo Cumonale chi at contipizatu s'ispesa e chin sa collaboratzione artistica de Francesco Del Casino, Nando Setzi e Lorenzo Calzone.


S'òpera chi venit inagurata, est pintata in una bratzata de muru a pacu tretu de sa domo de sa poetessa, chi paris chin s'umanitate e sa bellesa de sos versos e chin sa fortilesa de s'impegnu civile suo, at cunfortatu tantas famiglias chi aiant perditu unu parente in sas trinceas de sa prima gherra mondiale.


Su murale-monumentu est istatu istudiatu pro dare su riconnoschimentu pubblicu de sa fortza culturale de Grimenta e, a su matessi tempus, pro chi potat essere unu manifestu contra a sa gherra; cussa de tando e cussas de como.


Su sero est dedicatu a s'ammentu suo, chin sas zovanas impegnatas leghende sas poesias suas e chin sos coros e sos tenores de sa bidda chi an a cantare sos GOSOS PRO SOS MORTOS IN GHERRA.


Ringratziamus a Francesca Pittalis e a Lucia Prejata, che ant colluitu e publicatu totu sas poesias de Efisina de Grimenta. Est meritu de su travàgliu issoro si custu murale si est pòitu immaginare e pintare.


Sa Sotziedade Culturale Sinnos.

Post popolari in questo blog

Pasada - Ballos de Mes' Austu

Immagine
  Su 23 de austu b’at a èssere un'eventu chi tzèlebrat sa richesa de sas traditziones in s'ammajadore burgu de Pasada. Sa segunda editzione sua acasàgiat grupos minifolk bènnidos dae totu s'ìsula. Sa serada at a pigare vida cun un'isfilada in su tzentru istòricu, ue sos grupos ant a pònnere in mustra s'autentitzidade e sos colores de sos ballos traditzionales. A su tèrmine de s'isfilada, sos grupos ant a ballare in Pratza Belvedere, oferende un'ispetàculu de mùsica e ballu, unu donu a sa cultura e a sas raighinas de sa Sardigna. Sos grupos ant a èssere: Grupu Minifolk Pro Loco de Pasada Grupu Minifolk Oleri de Ovodda Grupu Minifolk San Larentu de Budoni Grupu Minifolk Sant'Antoni de Pàdua Lodè Grupu Minifolk Graziano Picoi de Buddusò Grupu Minifolk N. S. de Castro de Oschiri. Sa serada at a èssere presentada dae Francesco Spanu
Sighi a lèghere

Cursu de Limba Sarda in Thiniscole

Immagine
  S’Ufìtziu linguìsticu de su Monte Arvu organizat in Thiniscole, in sa Sala Consiliare de s’Unione, Carrera de Isalle, unu cursu de Limba Sarda. Dae su 8 de maju a su 10 de trìulas, cada mèrcuris a sas  chimbe de sero, b’ant a èssere deghe addòbbios cun proa finale in contu de fonologia, morfologia, sintassi e istòria de sa limba nostra. Su maistru at a èssere s’operadore de isportellu Mauro Piredda, espertu de limba sarda, giornalista e tradutore Pro si marcare tocat a imbiare una mail a cultura.unionemontalbo@gmail.com inditende: nùmene, sambenadu e nùmeru de telefoneddu pro sos cuntatos de grupu; Pro cada informatzione podes telefonare a su 0784 878648 internu 5, dae sas 8.30 a sas 13 onni die francu su sàbadu.
Sighi a lèghere