Novas, contos e cuentos

  Su 31 de santugaine in Bitzi, b'at a èssere sa de dòighi editziones de “Sa Vaina de su Porcu”, cun cumintzu a sas 18:00 in Pratza Asproni. B'at a èssere sa clàssica chena a base de petza de porcu in ùmidu e arrustu e binu a voluntade; pro unu costu de €15 a pessone. At a èssere presente sa barraca de su Comitadu de Santu Jorgi cun patatas fritas e birra. Pro animare sa serada b'at a èssere sa loteria e sa mùsica.

  Su comitadu Santu Jorgi de Bitzi at organizadu unu “Halloween party” pro sos prus piticos, pro su 2 de santandria. Sa festa at a èssere fata in su “The Planet Club” cun projetzione de su film Coco a sas 16:00. No ant a mancare ballos, giogos, leccornie e bibitas. Su comitadu cumbidat totu sos partetzipantes a andare mascherados??.  S'intrada tenet unu costu de €5.

  Sighint sos addòbios a s'iscoberta de sas dunas de Capo Comino, un'istraordinàriu ecosistema in sa costa orientale de sa nostra Sardigna. Su de tres addòbios at a èssere sàbadu 2 de santandria a sas 15:00 in sos parchègios de su Moletto a Capo Comino. Sa partetzipatzione est gratuita e pro cale si siat informatzione iscrìere a: ceasantalucia@gmail.com

  S'AVIS de Torpè at organizadu una mangianada pro sa donatzione de su sàmbene e est programmada pro su 9 de santandria dae sas 8:00 a sas 12:00 in Pratza de sos Mortos in gherra. Sunt invitados a partetzipare totu sas pessones cun edade intre sos 18 e sos 65 annos, in bona salude e cun unu pesu superiore a sos 50 kg. Si devet prenotare in WhatsApp a su +393519017692.

  Totu sas fainas chi fiant istadas programadas pro su 27 de santugaine, pro festare sos 10 annos de su Parcu de Tepilora, non si sunt pòdidas acumprire pro su tempu malu. Sos addòbios de Pasada e Torpè s'ant a tènnere, cun sas matessi modalidades, su 3 de santandria; mentras sas fainas prevìdidas in Lodè sunt tasidas a data de si destinare.

  Sa Pro Loco de Pasada, invitat totu cantos a colare su Pedi Cogone paris. Su 1 de Santandria dae sas 15:00 giughide  sas cabidaleras betzas de sos annos passados e chircade in sas bias de sa bidda e posca in su burgu antigu, sos puntos ammaniados dae sa Pro Loco! In sas vàrias istatziones s'at a pòdere  prenare sas cabidaleras cun durches e fintzas de carchi sorpresa gràtzias a sa collaboratzione cun su Ceas Casa Delle Dame Pasada! B'at a èssere su Pedi Cogone fintzas pro sos mannos, pro interessare totu sa famìllia in una serada de colare paris in sas bias de su burgu nostru a s'iscoberta de sas traditziones nostras.

  Su 4 de Santandria, in Bitzi, b'at a àere una mangianada pro ammentare sos mortos in gherra. At a cumintzare a sas 11 cun sa Santa Missa in sa crèsia de Santu Jorgi  Màrtire; sa tzerimònia at a sighire in sa Pratza Frades Preiata cun sa mutida de sos mortos e cun su positzionamentu e beneditzione de sa corona.

  Sa Pro Loco de Pasada, in ocasione de su pedi cogone, invitat sos chi nde tennent pràghere a donare a sas referentes cafè, tzùcaru, caramellas e frùtora sica. Totu sos benes retzidos ant a èssere donados su 1 de santandria a sos pipios in sos vàrios stand.

  Sa Pro Loco Thiniscole paris cun sos Comitados Leva 85 Santu Juanne Batista, Leva 78 Nostra Sennora de sas Gràtzias e Assòtziu “La Fenice”; bos isetant pro una die dedicade a sa golosidade, risitos e ispantos meda! At a èssere un'ocasione ispetziale pro fàghere iscobèrrere a sos prus piticos sas usàntzias, in un'atmosfera màgica e prena de colores. Duncas non bos perdais s'addòbiu de su  2 de santandria dae sas 8:00 in Pratza Màrtires de sa carrera de Fani 1 - Pratza de su Mercadu

  Su 29 de santugaine a sas 18.00 in sa Sala Consiliare de su Comunu de Thiniscole, b’at a èssere un'addòbiu intituladu: 'Sas cooperativas de comunidade: un’aina pro s'isvilupu e sa crèschida cumpartzida de sas comunidades nostras’. B'at a èssere sa possibilidade de cuntrastare cun sos espertos e de cumprèndere bene ite sunt sas cooperativas de comunidade, comente e pro ite naschent.

  Dae su 24 a su 26 de santugaine, ùndighi cantautores ant a èssere in Bitzi, pro sighire unu progetu de formatzione musicale pessadu dae s'istimadu Piero Marras. In prus a su programma de formatzione musicale, sos partetzipantes ant a tènnere sa possibilidade de connòschere mègius su territòriu bitzichesu cun s'istòria e sa cultura sua e de pòdere bisitare su Parcu de Tepilora. Pro concruire in bellesa su progetu su 26 b'at a èssere s'esibitzione musicale, cun intrada gratuita, in programma in su Tzìnema Teatru Ariston a sas 21; su giornalista Giacomo Serreli at a presentare sa serada.

  Su primu addòbiu de s'editzione “Come un libro aperto”, at a èssere su 31 de santugaine dae sas 15:30 a sas 19:00. Su progetu est istadu pessadu dae s'ispàtziu olìsticu “Artedintorni” in collaboratzione cun sa biblioteca de Thiniscole cun s'obietivu de creare momentos de comunidade leende ispiratzione dae sas istòrias angenas. Cale si siat deveret tènnere un'istòria chi potzat agiuare s'àtere o comente si siat unu contu importante podet mutire sa biblioteca o s'ispàtziu olisticu pro si pònnere a disponimentu.

  Sa biblioteca comunale de Thiniscole faghet ischire chi est esaurende s'ispàtziu pròpiu ma si cale si siat tzitadinu deveret tènnere unu libru dignu de nota chi retenet ùtile pro ismanniare su sèberu, lu podet giùghere in biblioteca a lu cunsignare a sos assistentes chi l'ant a valutare. Sos libros devent èssere in bene cunservados e podent èssere de vàriu gènere.

  S'abba est su bene prus pretziosu de sa vida nostra e nos nde abbizamus galu de prus de s'importu suo in momentos che a custu . Nos agatamus a bìvere in unu momentu crìticu pro more de sa farta de abba in su territòriu nostru, ca est dae meda chi non proet e  sos terrinos sunt totu sicos. Sa diga Maccheronis chi garantit sa provista a sos territòrios comunales de Torpè, Pasada, Thiniscole, Budoni e Santu Diadoru est pro nch’aggabbare sas ùrtimas iscortas suas e tocat a bi pònnere mèdiu. Custa situatzione de apretu a cumintzare dae su 22 de santugaine, cun sa punna de preservare pro prus tempus sas iscortas de sa diga Maccheronis, òbbligat a tancare s'abba a die e mesu. Sas manovras de abertura e serrada de s'abba ant a èssere fatas dae su personale addetu intre sas 8 e sas 10 de su mangianu. Casumai b’appant megioros, dèvidos a sa torrada de sas abbas, sa situatzione at a cambiare.

  Domìniga 27 de santugaine Su CEAS de Osidde proponet una die in su territòriu de Santu Lussùrgiu. Si tratat de un'escursione cun sa ghia de sos espertos de s'Agèntzia Forestas  in su territòriu in ue b’at coladu su fogu in s'istiu de su 2022; pro iscobèrrere sas peculiaridades ambientales e paisagìsticas de tutelare cun sa collaboratzione de su CEAS de Santu Lussùrgiu. S'essida est dedicada a sa tzitadinàntzia, adultos e pitzocos in àmbitu extraiscolàsticu, e in su merie est prevìdida una bìsita in su tzentru istòricu e in su Museu de sa Tecnologia Massajna. Sa partetzipatzione est gratuita ma est netzessàriu a s'iscrìere intro de su 25 de santugaine mutende a su nùmeru: 3391513094.

  De oje 22 de santugaine, su puntu de prelievu de Bitzi, in localidade “Gurumuru”, at a èssere torra operativu. Su servìtziu at a èssere ativu totu sos martis e sas chenàburas dae sas 8:30 a sas 11:30. Sa prenotatzione devet èssere fata tràmite CUP regionale. S’at a pòdere ritirare sos refertos dae su lunis a sa chenàbura dae sas 11:30 a sas 14:00 e su mèrcuris dae sas 15:00 a sas 17:30.

  Sa festa pro sos 10 annos de su Parcu de Tepilora sighit e su 27 de santugaine at a èssere una die rica de fainas pro mannos e piticos. Pritzos ant a èssere sos addòbios; intre sos cales: laboratòrios isportivos, catza a s’iscursòrgiu, passigiadas, escursiones, giros in kayak e in quad. Pro sa partetzipatzione a sas fainas est netzessàriu a si prenotare, mutende a sos nùmeros: 3332371759 o su 3470398951.

  S'eventu at a èssere su 17 de santugaine a sas 17:00 in s'Àula Consiliare de su Comunu de Pasada, e si proponet de afrontare chistiones detzisivas che a sa Tzitadinàntzia digitale, s'educatzione a s'impreu abbistu e crìticu de sos mèdios de comunicatzione dae parte de sos minores, su bullismu e àteros fenòmenos connètidos a una navigatzione online a arriscu. Durante su cunvegnu ant a èssere presentes espertos de su setore chi ant a intervènnere e ant a èssere prontos a dare cussìgios.

  In ocasione de sos 10 annos de su Parcu Tepilora, su 25 de santugaine, in Bitzi b'at a àere unu cunvegnu in sa Sala de Su parcu ex Giudice di pace, in sa carrera de Deffenu 69. Su cunvegnu at a cumintzare a sas 10 cun sos saludos istitutzionales, a sighire s'interventu de Marianna Mossa (diretora de su Parcu) pro contare de sos traguardos cròmpidos. Posca at a sighire sa discussione cun interventos istitutzionales e de su pùblicu cun tema: amparu de sa natura e oportunidade pro su territòriu. A coordinare su cunvegnu at a èssere Pietro Calvisi, giornalista e responsàbile de sa comunicatzione de su Parcu.

  Su 26 de santugaine, in Torpè, pro sos 10 annos de su Parcu Tepilora, b'at a àere una mangianada de discussione. Su cunvegnu at a èssere in sa sala consiliare de sa carrera de Munitzìpiu n10 e su tema at a èssere: Parcu Tepilora: cara a unu futuru de isvilupu sustenìbile, intre istrategias noas e reconnoschimentos internatzionales . Sa mangianada at a cumintzare cun sos saludos istitutzionales e b’ant a èssere paritzos interventos chi ant a afrontare temas diferentes che a: su pranu de su Parcu Tepilora; sa sentieristica in su parcu Tepilora; s'àrea Ramsar intre riu e foghe de su Riu Pasada; sa Riserva de Biosfera MaB Unesco Tepilora Riu Pasada Montarvu.

  B’at coladu deghe annos dae s'istitutzione de su Parcu naturale regionale de Tepilora chi aiat pigadu vida su 24 de santugaine de su 2014, cun unu votu unànime de su Cussìgiu regionale, subra de un'area de oto mìgia ètaros in sos territòrios de Pasada, Torpè, Lodè e Bitzi. In ocasione de sos primos deghe annos, dae su 25 a su 27 santugaine, b'ant a èssere cunvegnos e laboratòrios, escursiones ghiadas in sas realidades prus ammajadoras de su Parcu, pro mannos e pipios.

  Su 19 de santugaine, su Ceas de Santa Luchia, in ocasione de Ceas Abertos at organizadu un'importante serada pro connòschere mègius sas dunas de Capo Comino. S'addòbiu at a èssere a sas 16:00 in sa rotonda de sos parchègios de Capo Comino.  Sa partetzipatzione est gratùita.

  Oràrios de abertura de sos puntos de informatzione, in su mese de Santugaine, in sas bator biddas de su Parcu, a incuru de sos CEAS

  Su 15 de santugaine, in ocasione de Ceas Abertos, in Torpè b'at a àere una die de sensibilizatzione cun argumentu: sa terra. Sa faina, a su mangianu,  previdet sa prantada de àrbores de frutu in un'ispàtziu comunu cun sa consulèntzia de espertos. A merie b'at a àere laboratòrios mirados a su raportu intre sa terra e s'abba, riflessione e sensibilizatzione subra de sa temàtica de su consumu de s’impreu de sa terra. At a concruire sa die un'aperitivu sientìficu

  Chenàbura 18 de santugaine a sas oras 17:00 in sas salas de su MACLula at a èssere inaugurada sa mustra dedicada a s'arte de sa nuedda. Pasquale Ruju e Massimo Dell'Oglio ant a èssere presentes a s'inauguratzione. S'espositzione at a abarrare aberta a su pùblicu dae su 18 de santugaine 2024 a su 19 ghennàrgiu 2025. S'espositzione s’at a pòdere visitare dae sa chenàbura a sa domìniga dae sas 15:00 a sas 19:00.

  S'ASL de Nùgoro in collaboratzione cun su Comunu de Bitzi, presentat su progetu: Caminadores . Sunt  grupos de caminu pro totu sas edades, dae sos prus giòvanos a sos prus mannos. Custa faina motòria, acumprida in modu colletivu in su territòriu pròpiu e cun su sustennu de unu professionista laureadu in sièntzias motòrias, rapresentat un'importante oportunidade de salude e sotzializatzione. S'adesione est gratùita.

  Su comunu de Torpè est istadu seletzionadu pro partetzipare a su Progetu Polis, promòvidu dae Postas Italianas; pessadu pro megiorare s'atzessu a sos servìtzios de sa Pùblica Amministratzione.  S'ufìtziu postale de Torpè at a subire importantes traballos de amodernamentu, chi ant a inclùdere ispàtzios noos e tecnologias a s'avanguàrdia, pro fatzilitare s'atzessu a sos servìtzios de Postas Italianas e de sa Pùblica Amministratzione.

  Una serada interessante b’at a èssere in Lodè su 18 de santugaine in sos locales de Santu Juanne dae sas 17:30; at a èssere totu dedicadu a s'importante poetissa sarda Grazia Deledda. At a èssere presentada s'òpera teatrale “Tempo Cuore Luogo Ragione” cun  sa regia de Pierangela Calzone e su libru “Grazia Deledda e il lettino dello psicoanalista" de Franca Carboni chi at  a dialogare cun su pùblicu.

  Su 12 de santugaine, in Bitzi, at a èssere cunferidu su reconnoschimentu de sa prima editzione de su Prèmiu Natzionale Giorgio Asproni a s'iscritore Marcello Fois. S'eventu   s'at a faghere in su Tzìnema Ariston dae sas 17:30. Sa premiatzione, organizada dae sa Fundatzione Giorgio Asproni cun su patrotzìniu de su Comunu de Bitzi e de sa Fundatzione Giuseppe Bianchieri Ventimiglia, previdet sos saludos istitutzionales de su sìndigu, Giuseppe Ciccolini e s'interventu de Marcello Fois. Sa paràula at a colare posca a sos istòricos e membros de sa Fundatzione, Fulvio Conti, Marco Pignotti, Roberto Pranta. At a èssere posca sa bia de sa poetissa Vanessa Aroff Podda chi at a resare leturas a sos presentes. At a moderare sa serada su giornalista Fabio Marcello. A su binchidore de su prèmiu at a èssere cunsignada una òpera artìstica de balia realizada dae sos artisanos ceramistas locales.

   Sa A.S. D. Cicloamatori Thiniscole, in ocasione de sa festa de Nostra Sennora de sas Gràtzias, at organizadu sa de trinta editziones de sa “Gara tziclìstica tzircùitu de Thiniscole”. Sa gara at a èssere su 13 de santugaine e at a cunsìstere in 5 giros de tzircùitu pro unu totale de 50 km. Pro partetzipare tocat a s’iscrìere: sa cuota de iscritzione est de €20 (cumpresu de paninu e bibita) e faghet a la fàghere finas a sas 12:00 de sàbadu 12 de santugaine.

  Su 12 de santugaine, in ocasione de sa festa de Nostra Sennora de sas Gràtzias, at a cantare Max Gazzè cun “Orchestra Jazz Della Sardegna” . Su cuntzertu at a èssere in pratza Don Migliorisi a sas 22:00.

  A pustis de 8 annos torrat su pàliu de Nostra Sennora de sas Gràtzias a Thiniscole, in su galopatoiu Sant’ Elene in localidade Sant’ Elene, cun unu montepremi de €7.000 partzidu intre sos primos tres classificados riservadu a sos caddos anglo-àrabos dae 4 annos e prus. Durante sa manifestatzione s'at a fàghere una cursa riservada a sos cadderis locales cun unu montepremi de €600 prus su trofeu.

  Sa leva de su ‘77 de su comitadu de sa festa de Nostra Sennora de sas Gràtzias est alligru de bos invitare pro festare totus paris. Sa festa at a èssere su  11,12,13 e 14 de santugaine e b’ant a èssere paritzos addòbios pro ispassiare piticos e mannos; no ant a mancare càntigos, ballos, mùsica, garas e animatzione pro pipios. Non mancadas!

Servìtziu de TeleSardegna a incuru de Mariantonietta Piga pro bìdere su telegiornale intreu  incarcade inoghe  

  Su 7 de santugaine cumintzant sos cursos de ballu de sa “Futura Dancing School”; cursos pro totu sas edades. Meda sunt sos ballos intre cales seberare: dantzas caraìbicas, latinu americanu, lisu traditzionale, ballu de sala e ballos de grupu. Pro cale si siat informatzione mutire  a su n. 3492535534.

  Sa Biblioteca comunale de Thiniscole, dae un'idea de Monica Pusceddu, est organizende un'eventu de iscurtu e pedit a totu sos tzitadinos chi tenent calicuna cosa de contare de si rèndere ùtiles a su progetu ca si podet èssere de esèmpiu e de agiudu. Pro informatzione o pro dare s'adesione iscrìere a siniscolabiblioteca@gmail.com

  Su 18 de santugaine b’at a èssere una die de formatzione e escursione pro individuare  prantas vegetales alienas presentes mescamente in sas zonas ùmidas de s'àrea tutelada, intre sos territòrios de Pasada e Torpè e pro nde cumprèndere s'impatu chi podent tènnere in sa biodiversidade locale. Su progetu est dedicadu a insinnantes, ghias e educadoras/educadores ambientales e a totu sos tzitadinos interessados.  Su programma si partzit in duas importantes tapas; sa prima chi at a èssere dae sas 15:30 a sas 16 in sa sede de su Ceas de Pasada: at a èssere presentadu su progetu e sas  metodologias diferentes; sa segunda dae sas 16 a sas 19 in sas cales s'at a andare deretu a su territòriu pro cumprèndere comente a reconnòschere sos fundos. Sa partetzipatzione est gratùita, ma est netzessària s'iscritzione pro telèfonu a su 377 305 9522 o pro email iscriende a ceasposada@gmail.com

  S'assòtziu Tepilora Basket at organizadu duas seradas pro fàghere proare a totu sos pipios su basket; ant a èssere martis 8 e giòvia 10 de santugaine in sa palestra de sas iscolas mèdias in Torpè. B'at a àere tres grupos divididos pro edade; su primu grupu: dae sos 5 annos, martis a sas 17 e giòvia a sas 16:30; su segundu grupu: dae sos 8 annos, martis a sas 18 e giòvia a sas 17:30; su de tres grupos: dae sos 10 annos: martis a sas 19 e giòvia a sas 18:30. Pro cale si siat informatzione e pro iscritziones mutire a su n. 3272449309.

  Sunt abertas sas iscritziones pro sa partetzipatzione a sos cursos de nadu dedicados a sos pipios dae sos 6 a sos 15 annos. Su cursu at a èssere fatu cada sàbadu mangianu in sa piscina de Nùgoro. Su costu de su trasportu at a èssere garantidu dae su Comunu de Pasada imbetzes totu sas àteras ispesas las devent pagare sos partetzipantes. Sas domandas ant a dèvere èssere presentadas a s'ufìtziu protocollu de su comunu dae su primu de santugaine dae sas 12 de su 4 de santugaine.

  Dae sas 9:30 de su 30 de cabudanni fintzas  a sas 13:00 de chenàbura 4 de santugaine sunt abertas sas iscritzione pro sa Ludoteca comunale de Pasada; ant a èssere ammìtidos sos pipios intre sos 5 e sos 10 annos residentes in Pasada. Sos mòdulos pro s'iscritzione ant a èssere disponìbiles in s'intrada de su comunu e in su situ suo. Sos postos non sunt illimitados ma ant a èssere pigados sos pipios cunforma a s'òrdine cronològicu de sas rechertas. Sos ammìtidos ant a dèvere versare una cuota de partetzipatzione de €15.

  Su 3 de santugaine su progetu Ceas Abertos dat apuntamentu in Pasada pro una die dedicada a sa connoschèntzia de sa terra e a comente la pòdere amparare. Est istada organizada una passigiada in Orvile e atividades de “sketching”.

  “Mea Scuola Civica di musica”  at organizadu una serada pro presentare sos cursos suos, contivigiada in particulare dae sa classe de càntigu de sa mastra Elisabetta Uscidda. Su progetu at a èssere presentadu in Pasada in s'Auditòrium Comunale, a cumintzare a sas 18:30. S'intrada est gratuita finas a esaurimentu de sos postos.

  Sa biblioteca comunale de Bitzi at organizadu cursos de aprofundimentu e/o afortigamentu pro sos istudiantes de sas iscolas superioras; cale si siat siat interessadu podet andare a pedire informatziones in biblioteca. Est importante a andare a biblioteca a manifestare s'interessu pròpiu ca s'ant a ativare petzi sos cursos prus rechestos e est netzessàriu a lu fàghere intro su 30 de cabudanni. Sa partetzipatzione est gratuita.