Novas, contos e cuentos

Caricamento…

Est un’istòria longa 34 annos, sa de su Cagliari club Baronia Rossoblu (pro carchi annu intituladu a Matteo Villa) cun sede in Thiniscole. Trintabator cantos sunt sos cuintales chi pesat sa pedra posta sa prima die de nadale de su 2024 inaugurende su “Largo Grande Cagliari” (cun un’immàgine manna e galana de Gigi Riva cun sa màllia de su ‘70).  Custa aventura naschet 20 annos a pustis de s’iscudetu e in sas matessi dies chi Claudio Ranieri nche torreit s’iscuadra a sa sèrie A. Si su 20 de maju de su 1990 su Cagliari conchistat sa promotzione matemàtica paregende cun su Pisa (2-2 cun retes de Provitali e Valentini), deghe dies a pustis naschet su club cun su biadu de Salvatore Carta primu presidente, semper in su coro de sos tifosos thiniscolesos.  Dae tando su club (cun sos àteros presidentes Gianni Casaleggio, Pier Cipriano Murru, Tonino Mele, Carmelo Amabile, Maria Antonietta Casu, Davide Bellu, Edoardo Roccia e s’atuale Salvatore Fadda) at iscritu unas cantas pàginas de s’...

A sa una in prima cunvoca, e a sa una e mesa in segunda, martis su 17 de nadale b’at Cussìgiu comunale in Orune cun unu puntu ebbia in s’agenda de sos traballos: variatzione de su Bilantzu de previsione finantziàriu 2024/26. Sas proposte relativas a s’òrdine de sos traballos e sos documentos istrutòrios sunt depositados in segreteria comunale 24 oras in antis de sa setziada.

S’unidade territoriale de Nùgoro de E-distribuzione at avisadu a sos tzitadinos de Pasada chi domìniga su 15 de nadale, dae sas 3 de merie a sas 9 de sero, at a mancare sa lughe pro more de unos cantos traballos in sos impiantos. Custas sas carreras interessadas: sa de Vittorio Veneto (tzìvicu 1, dae su 9 a su 13, 2, 4, 10, 12, dae su 16 a su 22, dae su 28 a su 44, 16a, sn - pro su su gùturu sos nùmeros 4 e 6); sa de Grazia Deledda (5, 9, dae su 15 a su 19, dae su 23 a su 29, 2, 4, 10, 18, sn - pro su su gùturu sos nùmeros 3, dae su 7 a su 13, dae su 19 a su 23, 6, 10, sn) sa Nazionale (dae su 123 a su 131, 135, 137, dae su 218 a su 230, 276, sn - pro su su gùturu sos nùmeros dae su 2 a su 6, 10, sn); sa de Amendola (dae su 3 a s’11, dae su 2 a su 10, sn) sa de Mazzini (sn) Interessadas finamentas sas pratzas de Rockfeller (dae s’1 a su 5, 9, sn) e de sa Brigata Sassari (sn) Immàgine de Rahul

S’agentzia Laore at publicadu su bandu in contu de indennizos pro sas aziendas zootècnicas chi sunt sufrende sa sicagna. S’indennizu mentovadu pertocat su rimbursu de una cuota parte de sos gastos sustènnidos dae sos allevadores pro sa còmpora de sa proenda. Pro custu rimbursu cherent presentados totu sos documentos contàbiles de su perìodu intre sos meses de ghennàrgiu e de cabudanni de ocannu; de prus: sa sede de s’impresa devet fàghere parte de sa delimitatzione territoriale individuada dae su bandu (in sos allegados b’est fintzas s’ischeda de sos Comunes cun sos nùmeros de sos fògios catastales). Sas aziendas cun sos rechisitos a postu podent presentare dimanda finas a mesudie de su 7 de ghennàrgiu de s’annu nou. Sas informatziones prus minudas nche sunt in intro de sa pàgina dèghida de su situ web de Laore . Immàgine leada dae su situ de Laore.

Sàbadu su 7 de nadale bi fiat sa manifetatzione "Iscusorjos" aprontada dae sa Pro Loco de Thiniscole, chi nos at pedidu sa partetzipatzione comente Uls e comente "Pinna e tinteri" (grupu informale de amigos e amigas nàschidu in intro de sos cursos colados de limba sarda). Amus gestidu una tapa de custa "caccia al tesoro" dende a sas iscuadras unu testu dae ue deviant conchistare 10 puntos. Su testu est su chi sighit, gasi comente bi l'amus intregadu (4 puntos cheriant pigados boghende sa formulatzione isballiada intre sas 8 chi fiant iscritas in grassitu; 4 annanghende sas 8 paràulas mancante)

  Sa Pro loco de Thiniscole organizat pro sàbadu su 7 de nadale, dae sas 6 a sas 8 de sero, s’editzione natalìtzia de “Iscusorjos”, una cassa a su tesoru.        A s’initziativa, patrotzinada dae s’amministratzione comunale e cun sa partetzipatzione de unas cantas entidades locales (Tzentru de educatzione ambientale, Ufìtziu de sa limba sarda, grupu Pinna e Tinteri, Leva ‘78, biblioteca comunale “Grazia Deledda”), podent partetzipare finas a 8 iscuadras cun nessi 5 iscritos. Peri sas tapas – chi ant a èssere momentos de promotzione e de avaloramentu de sas traditziones, de sos logos e de sa cultura de su logu - sos partetzipantes devent afrontare proas e indevinzos. Pro sas iscritziones (7 èuros peròmine) cherent cuntatados sos nùmeros 380 3528990 e 347 7094134. Sa gara comintzat in pratza de Don Migliorisi.

  Su 9 de su mese de Nadale dae sas 10.30 in sa Sala Lilliu de sa Biblioteca regionale in s’Arburada de Trieste 137 in Casteddu, b’at a èssere sa Cunferèntzia Aberta de sa limba sarda, de su catalanu de s’Alighera, de su tataresu, de su gadduresu e e de su tabarchinu.   Ocannu su tema at a èssere su “Pianu nou de Polìtica Linguìstica de 5 annos, 2025-2029”, pro dessinnare sas prioridades e sas punnas generales, sos resurtados isbetados e sos elementos chi serbint pro avalorare sa polìtica linguìstica regionale. Sa Cunferèntzia Aberta, ghiada dae s’Assessora de s’Istrutzione Pùblica, Benes Culturales, Informatzione, Ispetàculu e Isport Ilaria Portas e coordinada dae su Cabu de Gabinetu  Andrea Dettori, at a èssere partzida in duas partes:   -       a mangianu, dae is 10.30, s’ant a acrarare sas fainas e sas atividades prus de importu fatas cun su PPL betzu cun interventos a subra de s’iscola, sos isportellos linguìsticos e ...

  Teniat sete annos ebbia Luca Locci cando, su 24 de làmpadas de su 1978, li pigheint sa libertade sua pro 93 dies. Fiat torrende dae sa marina de Bosa cun sa famìlia (francu su babbu chi, pilota, nche fiat currende in una gara in Macerata). Cando chi sa mama nch’intreit a domo acò a sos de s’Anònima chi lu secuestreint. S’acontèssida aiat postu mùtria prus chi non mala a sa comunidade sua de Macumere. Pagos annos a como Luca Locci at iscritu su libru “Il sequestro di un bambino, una storia vera” imprentadu dae sos de La Zattera. Chenàbura su 6, a sas 5.30 de merie, l’ant a presentare in sa biblioteca comunale de Osidde. Cun s’autore bi sunt sos Prof. Maria Francesca Ricci e Bastiano Virdis. S’eventu nch’est in intro de sos apuntamentos de “Incontri d’autore”.

Thiniscole tenet dae eris un’elementu toponomàsticu in prus: in ue sas carreras de Roma e de Gramsci s’aunint conca a su bighinadu de ‘Untana, como b’est “ Largo Grande Cagliari ”. Nudda mudat pro sos residentes chi mantenent s’indiritzu issoro, ma s’elementu simbòlicu est prus chi non mannu. S’idea est de su “ Cagliari club Baronia Rossoblu ” ghiadu como dae Salvo Fadda e ativu dae 34 annos in su territòriu cun sos assotziados suos impignados in campu sotziale e no isportivu ebbia (su club organizat dies ecològicas e àteras fainas de vàllia). E 34 sunt sos cuintales de sa pedra chi como est in cue ammentende s’iscuadra de su 1969/70 chi bincheit s’iscudetu . Cun Gigi Riva chi cumparet che chi esseret in atzione in cue etotu. Cussu tretu de bidda gasi numenadu l’ant inauguradu eris a mangianu, cun banderas, telos, càntigos (presente su coru Santa Luchia ) e versos (sos de Marcella Bandinu). S’eventu (ocasione finamentas pro ammentare sos de su Club chi non bi sunt prus, comintzende ...