Thiniscole. S'istòria e sas fainas de su Cagliari club "Baronia Rossoblu"

Est un’istòria longa 34 annos, sa de su Cagliari club Baronia Rossoblu (pro carchi annu intituladu a Matteo Villa) cun sede in Thiniscole. Trintabator cantos sunt sos cuintales chi pesat sa pedra posta sa prima die de nadale de su 2024 inaugurende su “Largo Grande Cagliari” (cun un’immàgine manna e galana de Gigi Riva cun sa màllia de su ‘70). 

Custa aventura naschet 20 annos a pustis de s’iscudetu e in sas matessi dies chi Claudio Ranieri nche torreit s’iscuadra a sa sèrie A. Si su 20 de maju de su 1990 su Cagliari conchistat sa promotzione matemàtica paregende cun su Pisa (2-2 cun retes de Provitali e Valentini), deghe dies a pustis naschet su club cun su biadu de Salvatore Carta primu presidente, semper in su coro de sos tifosos thiniscolesos. 

Dae tando su club (cun sos àteros presidentes Gianni Casaleggio, Pier Cipriano Murru, Tonino Mele, Carmelo Amabile, Maria Antonietta Casu, Davide Bellu, Edoardo Roccia e s’atuale Salvatore Fadda) at iscritu unas cantas pàginas de s’istòria chi nche bàrigat sas làcanas de sa passione pro su fùbalu e sas de su tifu pro sos beniaminos in màllia ruju-biaita. Nàschidu cun 400 tesserados in sos primos annos ‘90, como s’assòtziu nde tenet belle dughentos semper ativos mantenende bia sa punna sotziale de su club. 

Unos cantos esèmpios contant sas calidades umanas de sos tifosos baroniesos. Su 30 de ghennàrgiu de su 2000 sa projetzione de sa partida Juventus - Cagliari in sa sala de s’ex Onarmo (Opera nazionale assistenza religiosa e morale agli operai) est servida a collire dinare in sustegnu a sa batalla contra a sa Talassemia. 

Cando posca, su 2022, acontesseit su terremotu de su Molise, su Cagliari Club at regortu unas 2mìgia èuros donendelos a su Comune de San Giuliano di Puglia (in provìntzia de Campobasso) retzende sos ringratziamentos ufitziale de su sìndigu de tando, Antonio Borrelli, chi in cussu disacatu bi perdeit finas sa fìgia. 

Àteras fainas de giudu chi cherent contadas pertocant su contivìgiu de s’ambiente: sos assotziados, in prus de àere aprontadu paritzas Dies ecològicas collende arga dae sos tretos litoràneos de sas costeras galanas de Thiniscole, ant finamentas postu - unos bìndighi annos a como - unu nùmeru mannu de èlighes in su sartu de Janna ‘e Frores, essende dae sa bidda conca a Santa Luchia. 

Como sa passione ruju-biaita e s’ammentu de s’epopea de Scopigno, Riva e cumpàngios, tenet unu logu totu suo in tzitade: Largo Grande Cagliari. A largos annos, semper a costàgiu de su s’iscuadra de Casteddu e de totu sa Sardigna.