In Thiniscole su "Largo Grande Cagliari"
Thiniscole tenet dae eris un’elementu toponomàsticu in prus: in ue sas carreras de Roma e de Gramsci s’aunint conca a su bighinadu de ‘Untana, como b’est “Largo Grande Cagliari”. Nudda mudat pro sos residentes chi mantenent s’indiritzu issoro, ma s’elementu simbòlicu est prus chi non mannu. S’idea est de su “Cagliari club Baronia Rossoblu” ghiadu como dae Salvo Fadda e ativu dae 34 annos in su territòriu cun sos assotziados suos impignados in campu sotziale e no isportivu ebbia (su club organizat dies ecològicas e àteras fainas de vàllia). E 34 sunt sos cuintales de sa pedra chi como est in cue ammentende s’iscuadra de su 1969/70 chi bincheit s’iscudetu. Cun Gigi Riva chi cumparet che chi esseret in atzione in cue etotu. Cussu tretu de bidda gasi numenadu l’ant inauguradu eris a mangianu, cun banderas, telos, càntigos (presente su coru Santa Luchia) e versos (sos de Marcella Bandinu). S’eventu (ocasione finamentas pro ammentare sos de su Club chi non bi sunt prus, comintzende dae su primu presidente Salvatore Carta), una borta de prus, at ammentadu cantu su ruolu sotziale de s’iscuadra de Casteddu diat pòdere èssere importante in su fràigu de una cussèntzia de pòpulu. Ammentadu mescamente Gigi Riva, esèmpiu de comente si podet èssere sardos finamentas naschende in aterue.
