Su Mamentomo in Pasada
Su chi sos italianos narant “Mercoledì delle Ceneri”, in Sardigna est connotu comente a “Mèrcuris de lìssia” e in carchi bidda si tzèlebrat su ritu de su Mamentomo (reinterpretatzione linguìstica, in sardu, de su Memento Homo latinu).
Unu tempus, in Pasada, sa die sa zente cantaiat semper: “essinde carrasegare, intrende su Mamentomo, sas baghianas de como sunt imparende a ballare”. A sos ritos sacros, s'annanghiant fintzas sos profanos: finida sa missa, difatis, in su mentres chi sas pitzinnas fiant torrende a domo issoro, unos cantos grupos de pitzinnos si poniant in posta: sa punna issoro fiat su de las currizare e de lis tìnghere sa cara de nieddu cun su titieddu de s'ortigu brujadu. Una bera e pròpia parodia de cantu acontèssidu pagu prima in frau de sa missa, cando su preideru, a sos penitentes, lis aiat ghetadu sa chisina a conca.
Sos ritos profanos sighiant su sero, cando paritzos grupos de pitzinnos s’abojaiant e totus paris andaiant dae carrera in carrera e dae domo in domo, a untare sas pessones. Andaiant mescamente a sas abitatziones de sas pitzinnas galu baghianas, comente augùriu de agatarent cantu prima amoradu e/o maridu. Fintzas sa tzerimònia chi unos cantos pitzinnos tzelebraiant intro de note pertocaiat custu augùriu, cando, caratzados e cun in manu su rocu, unu bàculu puntudu, moviant cara a sas domos de sas baghianas e a s'intrada fichiant su bàculu in terra. A sighire comintzaiant a cantare:
“Tichirianna tocu
in s’oru ‘e sa janna
ti fichimmus su rocu
tocu tichirianna.
Tichirianna tocu
li fichimmus su rocu
in s’oru ‘e sa janna
tocu tichirianna”
trisinende in su càntigu fintzas sas pitzinnas. A pustis de custa ispètzie de serenada, sos mazores de sas pitzinnas teniant s'òbrigu/dovere de ofèrrere a bufare e a mandigare a custos giòvanos, dende·lis mescamente binu, urilletas e busones. Custa tzerimònia si mudaiat duncas in una bera e pròpia ocasione de cortegiamentu, in umbe sos pitzinnos teniant sa possibilidade de espressare su prètziu issoro cara a sas baghianas de sa bidda.
