Oto de martzu, boghes resistentes

 Fèminas e limbas minoritàrias, unu parallelismu netzessàriu

S’8 de martzu, diada internatzionale de sa fèmina, nos faeddat. E nos ponet a meledare in contu de su ruolu suo e de sos disafios fitianos peri su mundu. Pagas chidas a como, su 21 de freàrgiu, amus imbetzes tzelebradu sa diada internatzionale de sa Limba materna, un'ocasione pro dare valore a sa diversidade linguìstica e culturale de sos pòpulos. 

Leados gasi, custos duos eventos diant pòdere pàrrere a tesu s’unu dae s’àteru, ma falende·nche a fundu podimus sebestare unu parallelismu ispantosu. Ambas duas, sas limbas minoritàrias e sas fèminas, medas bortas sunt boghes silentziadas.

Sas limbas minoritàrias rapresentant oe s’identidade nostra, contant istòrias de su connotu e podent veiculare sas connoschèntzias atuales e de su benidore. E comente pro sas fèminas, chi pro sèculos intreos nche las ant esclùdidas dae sos tzentros de pòdere, giagarende·nche·las, fintzas a custas limbas nche las ant aoradas, minorizadas. 

Su poderiu monosessuadu e su poderiu monolinguìsticu oe sunt duas caras de su matessi soddu. E custos poderios protzedint a manu tenta reproduende milli àteras disagualidades sotziales. Devimus duncas punnare a sa paridade de gènere e a su bilinguismu comente parte de una batalla prus manna de trasformatzione sotziale in Sardigna e in totue.

Sa limba est fèmina, sa limba materna est mama. E nois fìgi@s de chie?

Su 21 de freàrgiu e s'8 de martzu cada die, paris, a manu tenta.