'Sa limba de Gabriel', su 29 de cabudanni sa projetzione de una pellìcula prena de amore pro sa Sardigna

Est cun praghere mannu chi s’Ufìtziu de sa limba sarda de s’Unione de sos Comunes de su Monte Arvu annùntziat s’essida de su metràgiu curtzu ‘Sa limba de Gabriel’, unu traballu cumpridu chi contat sa Sardigna cun sos ogros, su coro e sos pensos de Gabriel Middel-Okafor, fèmina tedesca innamorada manna de custa ìsula, de s’istòria, de sa cultura e, mescamente, de sa limba sua: su sardu.

Sa pellìcula, pensada che a unu docu-film antropològicu de casta etnogràfica-visuale, si proponet comente unu percursu in fatu a su raportu ìntimu chi issa at cunformadu cun sa Sardigna. No est petzi unu contu de viàgiu, ma un’esperièntzia interiore e culturale in ue sa protagonista nos contat sa visione sua de custa terra: gràtzias a sa vida de cada die; gràtzias a connoschèntzias de giudu; gràtzias a sa limba e a sas traditziones locales prus chi non contivigiadas. In custu contu prenu de passione non b’at galanias ebbia ma fintzas unas cantas problemàticas de sa terra de sos nuraghes.

Gabriel, cun fàghere dìligu e autènticu, contat de versos poèticos, de càntigos traditzionales, de leturas literàrias e fintzas de fainas che a sa de su tessòngiu: sìmbulos de un’identidade chi vivet e tzocheddat. Su filu ruju chi prendet custas temàticas est su de sa limba: su sardu chi pro issa no est unu mèdiu pro comunicare ebbia, ma unu patrimòniu chi cheret custoidu, una crae pro cumprèndere sas intragnas de unu pòpulu, unu ponte intre culturas.

Dae custu film essit a campu fintzas s’impignu tzivile e sotziale de chie at seberadu de contribuire cun briu a s’avaloramentu de su logu e a sa promotzione de sa limba pighende parte a initziativas culturales, laboratòrios e momentos cumpartzidos cun sas comunidades locales. 

‘Sa limba de Gabriel’ est su resurtu de unu traballu cumpridu sos meses colados e dòpia est sa punna sua. A un’ala b’est sa de sensibilizare sa gente in contu de limba comente veìculu de identidade e de memòria. A s’àtera b’est sa de mustrare s’atopu de mundos diferentes ingendradu dae custa trama invisìbile chi ammajat a chie lompet dae tesu, chi acollit a chie chircat apartenèntzia, chi intesset ligàmenes fundudos chi resistent a su tempus e sas distàntzias.  Una trama interculturale cun potentzialidades mannas a disponimentu nostru.

“Pro su tempus benidore auguro a sas sardas e a sos sardos chi s’abbigent de s’iscusòrgiu mannu chi tenent in sa limba insoro e chi sa limba sarda, una die, siat sa limba ufitziale de sa Sardigna”. Custa est s’aura de Gabriel.

Sa presentatzione de sa pellìcula, nàschida in intro de sas atividades de su Bandu TuLiS 2024 (art. 10, commas 3, 4 e 5 de sa LR 22/18, annualidade 2024), est programmada pro su 29 de cabudanni a sas 17.30 in sa sala consiliare de s’Unione de su Monte Arvu (in Thiniscole intrende dae carrera de Flumendosa). Sa dibata e sos momentos de cunfrontu in fatu a sa projetzione pùblica sua ant a èssere un’ocasione manna pro meledare in contu de limba e pro dare ondras, paris, a sa galania de sa Sardigna bida cun àteros ogros.