Bitzi - Cortes de natale
Che a cada annu Bitzi presentat sa manifestatzione iverrenile de sas Cortes de Natale, dae su 22 a su 31 de nadale, pro more de su contributu de sa Regione Autònoma de sa Sardigna ( lege regionale 7) e de su patrotzìniu de su Comunu de Bitzi e de Tepilora, Rio Posada e Montalbo - Riserva de sa Biosfera MaB Unesco.
Una filera de atividades caraterizadas dae s'ispìritu de Nadale e de totu s’atmosfera chi naschet in su coro de sa Sardigna, intre istòria, legenda e imaginàriu, in ocasione de sas festividades de nadale.
Sa manifestazione at a acabare su 31, cun una die prena de atividades e de traditziones religiosas e populares chi at a cumintzare giai a sas primas lughes de s'arbèschida cun su ritu de “S'arina capute”, cando sos pitzinnos, atobende domo pro domo, ant a gollire durches, frùtora e carchi soddeddu, sinnos de bona sorte pro s'annu nou chi est intrende.
A sighire, in pratza Giorgio Asproni, in cursu Vittorio Veneto e in sos gùturos de su tzentru istòricu b'ant a èssere sas melodias de sos càntigos a tenore e de sa SeuinStreetBand. E posca su màndigu locale in sas cortes e su “street food” in pratza ue sos fogos, inchesos dae su mangianu, ant a caentare s'atmosfera finas a su còmbidu de mesunote acumpangiadu dae s'esibitzione de “ Nord Sud Ovest Banda tributu a sos 883” e posca de sas performance de “Xander Dj”.
