Torpè - projetzione film BALENTES e presentada de su libru "Una ferita aperta"
TORPE’ - Chenàbura chi benit, su 22 de nadale de su 2023, s’Assessoradu de sa Cultura de Torpè, in collaboratzione cun Universidade de sa Tertza Edade de Thiniscole, est mannosu de acollire in bidda a Lisa Camillo, iscritora, produtora, antropologa, criminologa e regista famada.
Duos traballos suos ant a presentare: su film “Balentes: i coraggiosi” e su libru “Una ferita italiana”.
Lisa, naschida e crèschida in Sardigna, tzucat a Austràlia - e in ie bivet bìndighi annos. Torrat pro realizare unu documentàriu subra de sa Costa Smeralda, su logu chi l'at connota pitzinna, ma torrende no agatat prus su paradisu chi ammentaiat. Cun ogros noos bidet e iscoberit una terra de conchista: interessos econòmicos e tzerachias militares ant triuladu una de sas terras prus bellas de su mediterràneu. Polìgonos isperimentales, indùstrias chìmicas, penìsulas prestubidas, marinas marturizadas dae sas bombas, mìssiles arrambados in fundu de mare. Contos mulmutados de fetos deformes, tumores, leutzemias, bestiàmene cun assempros de mostres. Su dramma de sos militares malàidos e de sas famìlias issoro; patologias che a sas de sos sordados impestados dae s'uràniu impoveridu in Bòsnia.
E posca issos, sos sardos chi non s'arrendent e gherrant pro sa terra pròpia: procuradores, giornalistas, ativistas e tzitadinos simpres, protagonistas de un'istòria de resistèntzia disconnota, ma chi durat dae annos e annos. Custa istòria s'autora la contat in su documentàriu suo "Balentes: i coraggiosi", chi, distribuidu in paritzos paisos, in Itàlia istentat a agatare logu e in prus in unu libru chi contat sa Sardigna prus ìntima: unu contu de orgòlliu e timoria, coràgiu e miseresa, veridades ispantosas e fàulas criminales. Est s'istòria de una ferta italiana. Una ferta chi galu oe bogat sàmbene.
