Interventos de sustegnu pro sa fibromialgia

Karolina Grabowska (Pexels)

Fintzas pro ocannu sa Regione at finantziadu un’interventu de sustegnu pro sos chi sufrint de fibromialgia. Dae su primu de abrile, finas a su 30, totu sos tzitadinos interessados (e gasi sos de Thiniscole, Pasada, Torpè, Lodè, Orune, Bitzi, Osidde, Lùvula e Onanie) podent fàghere dimanda pro s’indennidade regionale 2024. Su sustegnu – chi cheret pedidu in su Comune de residèntzia) est de 800 èuros e lu podent retzire sos chi sunt in possessu de tzertificatzione mèiga – emìtida dae un’ispetzialista abilitadu a s’esertzìtziu de sa professione e iscritu a s’albu – chi atestet sa diàgnosi. In prus de custu recuisitu tocat chi s’interessadu non siat benefitziàriu de àtera mesura de sustegnu cuntzèdida petzi pro sa diàgnosi de sa fibromialgia. De prus, cherent alliongiados sa còpia de su documentu de identidade e de sa tèssera sanitària e s’Isee ordinàriu 2024. Custu pro sas istàntzias noas. Pro sos chi ant benefitziadu de s’indennidade regionale s’annu coladu podet bastare sa rechesta giai presentada, ma est netzessàriu a cunfirmare sos recuisitos a su Comune pro mèdiu de una modulìstica apòsita cun s’Isee noa, sempre intro de su 30 de abrile. Info prus a minudu in sos sitos de sos Comunes.


Post popolari in questo blog

Pasada - Ballos de Mes' Austu

Immagine
  Su 23 de austu b’at a èssere un'eventu chi tzèlebrat sa richesa de sas traditziones in s'ammajadore burgu de Pasada. Sa segunda editzione sua acasàgiat grupos minifolk bènnidos dae totu s'ìsula. Sa serada at a pigare vida cun un'isfilada in su tzentru istòricu, ue sos grupos ant a pònnere in mustra s'autentitzidade e sos colores de sos ballos traditzionales. A su tèrmine de s'isfilada, sos grupos ant a ballare in Pratza Belvedere, oferende un'ispetàculu de mùsica e ballu, unu donu a sa cultura e a sas raighinas de sa Sardigna. Sos grupos ant a èssere: Grupu Minifolk Pro Loco de Pasada Grupu Minifolk Oleri de Ovodda Grupu Minifolk San Larentu de Budoni Grupu Minifolk Sant'Antoni de Pàdua Lodè Grupu Minifolk Graziano Picoi de Buddusò Grupu Minifolk N. S. de Castro de Oschiri. Sa serada at a èssere presentada dae Francesco Spanu
Sighi a lèghere

Cursu de Limba Sarda in Thiniscole

Immagine
  S’Ufìtziu linguìsticu de su Monte Arvu organizat in Thiniscole, in sa Sala Consiliare de s’Unione, Carrera de Isalle, unu cursu de Limba Sarda. Dae su 8 de maju a su 10 de trìulas, cada mèrcuris a sas  chimbe de sero, b’ant a èssere deghe addòbbios cun proa finale in contu de fonologia, morfologia, sintassi e istòria de sa limba nostra. Su maistru at a èssere s’operadore de isportellu Mauro Piredda, espertu de limba sarda, giornalista e tradutore Pro si marcare tocat a imbiare una mail a cultura.unionemontalbo@gmail.com inditende: nùmene, sambenadu e nùmeru de telefoneddu pro sos cuntatos de grupu; Pro cada informatzione podes telefonare a su 0784 878648 internu 5, dae sas 8.30 a sas 13 onni die francu su sàbadu.
Sighi a lèghere