Genius Loci, in Lodè sa presentatzione de su Museu in logu abertu

Est in ue sos nuscos de sos fundos s’atopant cun s’àlinu de sos montes. Est in ue su tempus paret andende a lenu intre gùturos e carrelas. Est inoghe chi naschet “Il  Museo a Cielo Aperto - Genius Loci Lodè”, unu viàgiu turìsticu contadu chi nos torrat sa memòria de unu logu autènticu in su coro de sa Baronia. Custu museu est un’invitu pro chi caminemus ascurtende, un’itineràriu fundudu de belle 5 chilòmetros colende in carreras mediaveles e in caminos de monte chi oferint grandu valore paesagìsticu, istòricu e  antropico. Unu museu in logu abertu in ue cada firmada est un’istòria de iscobèrrere. Bintibator sunt sos puntos de importu, 13 in intro de sa bidda e 11 in foras, introduidos dae unu puntu de intrada comunale. Cada pannellu e cada àteru contenutu aàudiovisivu collegadu pro mèdiu de còdighe qr est in sardu, inglesu e italianu. Sos pannellos sunt iscritos in limba sarda comuna, sa boghe chi s’intendet est in lodinu. Contos curtzos ma prenos chi faeddant de istòrias, paristòrias e curiosidades, mi fintzas de mudìmenes, paesàgios e identidades. Murales, crèsias, funtanas, craros e domos nos torrant sa cultura materiale e immateriale de Lodè acumpangende su visitadore in s’iscoberta de su logu. S’inauguratzione est programmada pro su 2 de santugaine a sas 17.30 in sa sal consiliare de su Comune de Lodè. Su progetu, promòvidu dae s’amministratzione comunale, finantziadu dae su GAL Nuorese Baronia e dae su  FEASR, nch’est in intro de s’interventu “Integrazione e potenziamento della rete degli itinerari  turistici tematici”. Ideadu dae su Ceas Montalbo de Lodè, coordinadu dae su regista multimediale  Francesco Casu, realizadu dae HQ Media srl, at interessdu s'Unione de sos Comunes de su  Monte Arvu, chircadores, progetistas, tècnicos e assòtzios locales, cun sa punna de avalorare su territòriu e de nde trasmìtere s’ànima in forma partetzipada, innovativa e sustenibile.