Reconnoschimentos - S'Unione de sos Comunos de su Montalbo premiada in Pàdua pro su progetu 'Locos de Cultura'

 

S'Unione de sos Comunos de su Montearvu at retzidu unu mentovu ispetziale in su Prèmiu “Bonas Pràticas 2025” in s'àmbitu de sos Istados Generales de sas Tzitades Intelligentes, fatu in Pàdua su 20 e 21 santugaine. Su reconnoschimentu l’ant dadu pro su progetu “Locos de Cultura”, initziativa istratègica chi pertocat noe comunidades de sa Sardigna – Bitzi, Lodè, Lùvula, Onanie, Orune, Osidde, Pasada, Thiniscole, Torpè - unidas dae sa voluntade de avalorare sa limba sarda e su patrimòniu culturale locale pro mèdiu de ainas innovativas, inclusivas e sustenìbiles.

Sos Istados generales de sas tzitades intelligentes, lòmpidu a sa de ses editziones, est su grandu eventu annuale chi riunit in Pàdua sa community de City Vision. Prus de 1000 partetzipantes intre amministradores e dirigentes de sa Pùblica Amministratzione, impresas, ricercadores e innovadores de cada regione italiana si sunt addobiados pro cumpartzire esperièntzias, progetare solutziones e torrare a definire su tempus benidore de sas tzitades.

In sa lìtera ufitziale chi at annuntziadu su mentovu, b’at iscritu: “Sa Cummissione valutatrice at apretziadu de su totu su progetu e l'at giudicadu idòneu a su reconnoschimentu de ‘Bona pràtica’ de difùndere in sa comunidade de sas amministratziones pùblicas e impresas de City Vision.”
“Locos de Cultura” est nàschidu cun s'obietivu de si distìnghere pro s'acostamentu sistèmicu suo e collaborativu: sos noe comunos òperant in sinergia, barighende∙nde sa frammentatzione amministrativa e promovende servìtzios assotziados prus efitzientes e mirados.

Custu progetu, nàschidu pro more de su finantziamentu de sa Regione Autònoma de sa Sardigna, in intro de su Bandu TuLiS (art. 10, coma 3, 4 e 5 de ischit LR 22/18), ponet in pare sa traditzione linguìstica cun sas potentzialidades ofertas dae sa digitalizatzione, peri interventos comunicativos cuncretos chi trasformant sos logos de sa cultura in logos atzessìbiles, dinàmicos e intelligentes. Sa tecnologia devenit gasi alleada de sa memòria e de su contu identitàriu: museos, bibliotecas, archìvios e giassos de interessu culturale s'aberint a modalidades noas de impreu, in limba sarda, pro unu pùblicu semper prus ampru, abbistu e partetzipe. Est, in prus, che a unu motore de innovatzione comunicativa territoriale, dende vida a una narratzione cumpartzida chi avalorat sa cultura, sa limba e su paisàgiu de unu territòriu chi ruet in su Parcu Regionale Naturale de Tepilora e in sa Riserva de Biosfera MaB Unesco  Tepilora, Rio Posada e Montalbo in crae turìstica. Unu turismu culturale autènticu, esperientziale e sustenìbile. Particulare atentzione est dada a s'inclusione sotziale pro promòvere in manera ativa sa partetzipatzione de categorias fràgiles, garantende su deretu a sa cultura, a s'espressione e a sa tzitadinàntzia ativa.

 “Locos de Cultura”, tando, no est petzi unu progetu, ma una bisione: unu laboratòriu territoriale ue memòria e tempus benidore diàlogant pro fraigare unu modellu nou de isvilupu fundadu subra de identidade, inclusione e innovatzione.