Serrat s'Uls, torrat a abèrrere s'Uls. A luego cun sas novas

Est finida oe un’annualidade noa de s’Ufìtziu de sa limba sarda de s’Unione de sos Comunes de su Montearvu. Dae su mese de santandria de s’annu coladu amus traballadu pro afortire sa presèntzia de su sardu in sa sotziedade pro mèdiu de tradutziones e de consulèntzias e abarrende a disponimentu de entes, assòtzios, famìlias, iscolas e tzitadinos. Amus fintzas acumpridu a atividades culturales (Locos de cultura) e a duos cursos de limba, unu base pro cumpèndere sos mecanismos de iscritura locale e subralocale e unu avantzadu pro perfetzionare s’iscritura matessi in intro de sos protzessos comunicativos prus mannos. Como sa Regione at aprovadu unu progetu nostru triennale e pro custu s’Uls at a torrare a abèrrere luego, cun atividades noas e àteros cursos de limba chi bos nd’amus a dare nova sas chidas imbenientes. Bos torramus gràtzias. Abarrade sintonizados.