Su Comune de Osidde at publicadu unu bandu istratègicu in favore de sa crèschida demogràfica de su territòriu oferende contributos a fundu pèrdidu pro residèntzias in su tzentru abitadu. S'initziativa nch’est in intro de sas dispositziones regionales contra a s’ispopulamentu de sas biddas minores de Sardigna. Su finantziamentu a fundu pèrdidu serbit pro su 50% de sos gastos sustènnidos finas a un’importu màssimu de 15mìgia èuros pro cada rechedidore. Sos fundos podent èssere impreados pro sa còmpora de un’immòbile de prima resudèntzia, pro sos annoamentos de un’abitatzione betza e pro ambas duas possibilidades cumbinadas. Podent presentare dimanda sas persones fìsicas chi si nche cherent tramudare sa residèntzia a Osidde (intro de 18 meses dae sa còmpora o dae sos concruos de sos traballos). B’at àteros duos vìnculos: su trasferimentu cheret fatu dae unu Comune prus mannu de 3mìgia abitantes; su benefitziàriu est obligadu a mantènnere sa residèntzia e a non bèndere s’immòbile pro nessi chimbe annos dae s’erogatzione de su saldu. Pro sas dimandas non b’at iscadèntzia. S’esame issoro l’ant a fàghere mese cun mese (ant giai comintzadu dae su de nadale de s’annu coladu) e s’at a protzèdere finas a cantu b’at fundos. Custos unos cantos critèrios pro s’istèrrida de sa graduatòria: in contu de nùcleu familiare si dant finas a 10 puntos pro sas famìlias cun 4 o prus cumponentes; 8 puntos pro sos interventos chi lompent o nche colant sos 30mìgia èuros; 5 pro chie recùperat immòbiles inagìbiles in su tzentru istòricu. Sa dimanda cheret imbiada via pec a s’indiritzu ufficiotecnico@pec.comune.osidda.nu.it (ma fintzas presentada a manu in su Protocollu de su Comune. Totu sas informatzione las agatades in su situ web istitutzionale de su Comune de Osidde.
mp
.jpg)
.png)
