Plus de Thiniscole, un’addòbiu su 22 de ghennàrgiu in contu de afidamentu familiare

Pexels.com @Kindel Media

S’addòbiu est in Orosei, ma l’est aprontende su Plus de Thiniscole (in ue de sas 9 biddas de su Unione de su Montearvu bi sunt fintzas Lodè, Pasada e Torpè). Su 22 de ghennàrgiu a sas 4 de merie s’at a faeddare de afidamentu familiare in sos locales de "Sa Finanza Vetza" in carrera de La Marmora. S’initziativa naschet cun sa punna de bìdere mègius custu tema dìligu, est a nàrrere sa capatzidade de acollire pro unu tempus limitadu unu minore in su nùcleu familiare. A su chiu de sa chistione b’at a intrare s’avocada Franca Della Camelia, professionista cun esperièntzia manna a palas e chi como est presidente de sa setzione "Avvocatura e Famiglia". Su traballu suo est connotu fintzas pro su chi at fatu in sos tzentros antiviolèntzia de Terranoa e de Aristanis e fintzas pro àteros incàrrigos suos comente Curadora ispetziale de minores e Tutora di minores istràngios no acumpangiados. In s’addòbiu s’ant a aprofundire sas chistiones giurìdicas e sas normativas chi règulant s'afidamentu, sas implicatziones sotziales e su valore de su sustegnu a sas famìlias in dificultade.

mp