A bi la damus una segunda vida a sas cosas? Chenàbura su 6 in Santa Luchia

B’at unu momentu, mescamente cando colamus dae un’istajone a s’àtera, chi tocat a cambiare sos armàdios. O puru cando, ponende òrdine in chentina o in su sostre, nos abbigiamus de ogetos “mudos” populende sas domos nostras. Un’eletrodomèsticu, unu libru mai abertu, unu bentone chi non nos intrat prus. Totu cosas chi non nche las devimus imbolare a mala gana. 

Bene, gràtzias a su Ceas de Santa Luchia diamus pòdere dare una segunda vida a custas cosas. S’apuntamentu de chenàbura su 6 (dae sas 4 de merie in s’istrutura de carrera de Giovanni da Verrazzano, serente a sa pineta) no est petzi unu mercatinu, ma un’invitu pro chi torremus a pensare su raportu nostru cun su chi possedimus.

S’eventu nch’est in intro de unu progetu de educatzione ambientale in contu de cuntrastu a sa chi li narant Fast fashion, unu modellu de business chi movet dae sa produtzione frenètica de bestires cun calidade bassa, ispirados a sas ùrtimas tendèntzias e bèndidos a s’istracu baratu. Bestires chi in giru de pagas chidas non sunt prus de moda e chi tocat a los remplasare cun àteros bàtiles de comporare a baratu e a lestru alimentende unu tziclu produtivu tòssicu. Sas operadoras de su Ceas nos proponent imbetzes una visione de economia tzirculare prus rispetosa de s’ogetu matessi e de s’ambiente pro mèdiu de s’iscàmbiu. S’apuntamentu est in su Ceas. Pro àere informatziones prus a minudu est bastante a intrare a su situ ceassantalucia.it.

mp