Die Internatzionale de sa Limba Materna, su 21 de freàrgiu - Invitu a sa partetzipatzione de sas iscolas de su territòriu

 

Dirigentes e Dotzentes istimados,

s'Ufìtziu de sa Limba Sarda de s'Unione de sos Comunos de su Montearvu s’incumandat a bois in ocasione de sa Die Internatzionale de sa Limba Materna, tzelebrada cada annu su 21 freàrgiu pro more de s'UNESCO pro promòvere sa limba nadia, sa diversidade linguìstica e culturale e su valore de su multilinguismu.

Custa festa, istituida su 1999 e reconnota dae s'Assemblea Generale de sas Natziones Unidas su 2007, naschet pro ammentare un'acadessimentu tristu, ma fundamentale, pro s'istòria de sos deretos linguìsticos: su 21 de freàrgiu de su 1952 sa politzia pakistana ochit unos cantos istudiantes bengalesos de s'Universidade de Dacca, pitzinnos giòvanos chi fiant manifestende  pro su reconnoschimentu de su bengalesu che a limba ufitziale. Dae tando, custa data est sìmbulu universale de sa defensa de sas limbas e de sas identidades culturales.

Pro su territòriu nostru, ricu de istòria, traditziones e mescamente de una limba pròpia che a su sardu, custa est una die de primore pro meledare in pare in contu a su valore de sa limba materna comente a faina de identidade, de apartenèntzia e de continuidade culturale. Sa limba sarda no est petzi unu mèdiu de comunicatzione: est unu patrimòniu immateriale chi contat su passadu nostru, sestat su presente nostru e podet ofèrrere a sos giòvanos momentos noos de letura pro cumprèndere su mundu e su tempus benidore.

Pro custu motivu, bos invitamus a interessare a sos istudiantes bostros, fèminas e òmines, in laboratòrios, momentos de cunfrontu, dibatas o simpres riflessiones chi los potzant acurtziare a su tema de sa limba nostra e a su significadu prus fungudu de custa die. Cada faina, fintzas minore, contribuit a afortiare sa cussèntzia linguìstica e culturale de sas generatziones noas.

S'Ufìtziu de sa Limba Sarda est a disponimentu pro agiudare a sas iscolas cun materiales, impòsitos o collaboratziones ùtiles a sa realizatzione de initziativas dedicadas.

Semus seguros de sa sensibilidade bostra e de sa collaboratzione pretziosa bostra, bos torramus gràtzias giai dae como pro s'atentzione e pro s'aficu chi in manera fitiana ponides pro sa crèschida culturale de sos pitzinnos nostros.

Saludos

Ufìtziu de sa Limba Sarda - Unione de sos Comunos de su Montearvu