In domo sena barreras. Sa ghia a su bandu permanente de sa Regione Sardigna

Su diritu a sa mobilidade e a s’indipendèntzia intre sos muros de domo rapresentat unu printzìpiu fundamentale pro sa dignidade e sa calidade de sa vida de cada tzitadinu. Pro chi custu printzìpiu siat una realidade sa Regione tenet unu bandu permanente dedicadu a s’abbatimentu de sas barreras architetònicas de sos edifìtzios privados.

Totu custu dende atuatzione a sa lege 13/1989 e a sa lege regionale 32/1991. Est un’istrumentu de grandu importu pro dare agiudu cuncretu a famìlias e tzitadinos chi cunvivent die cun die cun limitatziones funtzionales.

Su contributu est pro sos chi tenent menomatziones o limitatziones permanentes (fintzas visivas) e chi ant sa residèntzia anagràfica e sa dimora abituale issoro in s’immòbile ogetu de s’interventu. Sa rechesta podet èssere presentada dae su tzitadinu interessadu o dae chie nd’esèrtzitat sa tutela legale o su contivìgiu.

Sos interventos chi si podent finantziare pertocant s’installatzione de ascensores e monta-iscalas, de rampas de atzessu, de dispositivos de signalatzione pro favorire s’autonomia motòria e sensoriale, ma fintzas sa modìfica de ghennas o cantzellos. Sunt ammìtidos a sos benefìtzios sos edifìtzios fraigados o fatos a nou de su totu in antis de s’11 de austu de su 1989, ma fintzas immòbiles prus reghentes pro traballos ispetzìficos ligados a s’adatabilidade.

Sa ventana temporale pro presentare sa rechesta iscadit su primu de martzu (chi ocannu est in domìniga, tocat de averguare sos avisos comunales) de cada annu. Sos tzitadinos devent alliongiare a s’istàntzia unu tzertificadu mèigu chi atestet sa patologia e sas dificultades motòrias relativas. In pare a totu custu una decraratzione sostitutiva de s’atu notòriu chi ispetzìfichet s’ubicatzione de s’immòbile e sa natura de sos interventos chi cherent fatos.

Sas dimandas sunt posca insertadas in tres graduatòrias regionales: sa “A” pro sos immòbiles fatos in antis de su 1989, sa “B” pro cussos a pustis, sa “C” pro sos contributos integrativos regionales finas a unu màssimu de 10mìgia èuros. Sas rechestas lassadas in foras pro more de fundos limitados abarrant vàlidas pro sos annos a pustis. Pro àere detàllios prus a minudu e fintzas sa modulìstica tocat de abbaidare a sos sitos istitutzionales de sos Comunes.

mp