Una die de cultura e traditziones: s'Universidade de sa Tertza Edade de Thiniscole in bìsita in Lodè
Sàpadu su 21 de freàrgiu
s'Universidade de sa Tertza Edade de Thiniscole at dedicadu una die intrea a Lodè
e a sos iscusòrgios culturales suos, acumpangiada dae s'Ufìtziu Limba Sarda de
s'Unione de sos Comunes de su Monte Arvu. Una bìsita rica e partetzipada, ghiada
in sardu e in italianu, chi at permìtidu a sos visitadores de aprofundire temas
ligados a su muralismu, a s'istòria de sa bidda, a sas genias architetònicas
traditzionales e a su patrimòniu religiosu de custa comunidade.
A pustis de una passigiada in sas
carreras de sa bidda medievale, tra contos de istòria locale e memòrias
populares, su grupu at mandigadu in pare, cumpartzinde màndigos isulanos che panadas
oschireras e uruglietas lodinas in pare a binos sardos, in antis de sighire
cara a unu de sos logos prus ammajadores de su territòriu: sas Domus de Janas
de Janna Oriavula. Inoghe sos partetzipantes ant pòdidu iscobèrrere s'orìgine
de su su nùmene locale, sa cala de sos naneddos, chi dae annos e annòrios alimentat
s'imaginàriu colletivu lodinu.
Posca S'UTE est andada a su
Santuàriu de sa S’Annosata de Bitzi, in ue su priore Paolo Giorgio Ligios at
acollidu su grupu contende de sas peculiaridades istòricas, artìsticas e
devotzionales de su santuàriu, puntu de riferimentu identitàriu pro
fideles e visitadores.
A serrare sa die, sa torrada a
Lodè pro intrare in su “Carrasecare Lodinu” e bìdere s'isfilada de “Sas
màscaras netas”, de “Sas màscaras brutas” e de su grupu istràngiu de Olzai
“Maimones – Murronarzos e Intintos”, protagonistas de una traditzione chi unit
memòria, sìmbulos arcàicos e forte partetzipatzione populare.
Un'addòbiu chi at intritzadu
cultura, archeologia, benes identitàrios e limba sarda, cunfirmende su valore de
sa connoschèntzia cumpartzida e de s'esperièntzia direta in sos logos chi
custoint s'istòria de su territòriu.
.jpg)
.png)
