Contributos contra a sa "maladia invisìbile". In sos Comunes sas dimandas pro s’indennidade regionale fibromialgia 2026

Li narant fintzas “sa maladia invisìbile” ca non lassat marcos ne in sa carena ne in sas radiografias. Ma est una maladia chi si faghet intèndere, manifestende·si cun dolores mùsculu-ischelètricos, istrachesa crònica e istorbos de su sonnu chi cunditzionant in forma grae onni atzione de sa vida de cada die. Pro dare unu sustegnu cuncretu a chie cun custa sìndrome cumplessa bi cunvivet, sa Regione Sardigna at cunfirmadu fintzas pro ocannu s'erogatzione de s'indennidade Irf, un’istrumentu nàschidu pro megiorare sa calidade de sa vida de sos tzitadinos interessados.

Sa misura, in atuatzione de sa lege regionale 5 de su 2019, previdet unu contributu econòmicu chi podet lòmpere a unu màssimu de 800 èuros pro su rimbursu de su chi s’at ispèndidu pro curas, meighinas e assistèntzia ispetzìfica. Pro atzèdere a custu benefìtziu, tocat a èssere residentes in Sardigna e, cosa fundamentale, èssere in possessu de una tzertificatzione mèdica fata dae un’ispetzialista abilitadu, pùblicu o privadu, chi atestet sa diàgnosi intro su tèrmine de su 30 de abrile. Est importante a sutaliniare chi non balet sa tzertificatzione de su mèigu generale.

Su sustegnu, però, no est che pare pro totu cantos: s'importu est moduladu cunforma a sa situatzione econòmica de su nùcleu familiare, mesurada pro mèdiu de s’indicadore Isee. Si chie non nche brincat sa tzifra de 15mìgia èuros podet retzire su finantziamentu integrale de su progetu, pro sas fàscias superiores b’at decurtatziones progressivas dae su 5 finas, pro chie nche colat sos 80mìgia èuros, a s’80%. Atentzione ca sa cuota màssima de decurtazione est prevìdida fintzas pro chie non presentat s'atestatzione Isee.

Sas ispesas ammissìbiles rifletent sa natura multidisciplinària de sa cura pro sa fibromialgia, includende meighinas e integradores privos de copertura pùblica, ma fintzas servìtzios de assistèntzia domitziliare, atividades fìsicas prescrìvidas dae su mèigu e finas permanèntzias in istruturas autorizadas. Pro otènnere su rimbursu, sos benefitziàrios devent presentare su rendicontu de sas ispesas sustènnidas intro de sa fine de s'annu, alligongende sos iscumproos de ispesa e, si netzessàriu, sas prescritziones mèdicas.

Mancari sa guarnissa normativa siat regionale e sas resursas cumplessivas ammontent a 5 milliones de èuros, sa gestione operativa est afidada a sos munitzìpios. Pro custu motivu, cada tzitadinu interessadu cheret chi consultet cun atentzione su situ web istitutzionale de su Comune pròpiu de residèntzia, o chi andet de persone a s'ufìtziu Servìtzios sotziales pro àere s'avisu cumpletu e sa modulistica netzessària. Sos tèrmines pro presentare sas dimanda iscadint in generale su 30 de abrile.

Foto de Rodolfo Clix