Riserva de Biosfera, naschet sa Consulta de sos Giòvanos. Candidaduras intro de su 27 de martzu

Non "de traballare pro sos giòvanos" ebbia. Su disafiu de sa Riserva de Biosfera MaB Unesco de Tepilora, Rio Posada e Montalbo est su "de traballare cun sos giòvanos". Est cun custa punna chi dae su Parcu de Tepilora ant publicadu sa manifestatzione de interessu pro sa costitutzione de sa prima Consulta de sos Giòvanos de sa Riserva. S'initziativa no est petzi un'atu formale, ma s'atuatzione direta de sas lìnias ghia aprovadas dae su de chimbe Cungressos mundiales MaB de Hangzhou e dae su Pianu de Atzione omònimu (2026-2035). S'obietivu est craru: trasformare sas generatziones noas, non prus benefitziàrias ebbia de polìticas ambientales ma co-protagonistas de sas detzisiones chi pertocant su tempus benidore de su territòriu issoro.

Unu ruolo istratègicu e propositivu

Binti ant a èssere sos cumponentes chi ant a operare comente organismu consultivu e propositivu pro su Comitadu de Gestione. Còmpitu de sos membros suos at a èssere su de annoare sas prospetivas de sa Riserva, giughende sensibilidades tecnològicas e comunicativas noas, promovende su sentidu de apartenèntzia e traballende comente "ambasciadores" de sos valores Unesco. At a èssere unu laboratòriu de tzitadinàntzia ativa e de networking, a tretu de connètere su Nord-Sardigna cun sas retes internatzionales de su programma Man and the Biosphere.

Recuisitos e modalidade de partetzipatzione

Su bandu est indiritzadu a pitzocos de edade intre sos 16 e sos 35 annos. Sos recuisitos printzipales pertocant sa residèntzia in unu de sos Comunes de sa Riserva o unu ligàmene iscumproadu (istùdiu, traballu o afetivu) cun su territòriu, in prus de unu forte interessu pro sa sustenibilidade. Sa partetzipatzione est voluntària e gratùita. Sos incàrrigos ant a durare finas a su 30 de làmpadas de su 2029. In casu de nùmeru de candidaduras chi sobrat sos postos a disponimentu, sa seletzione at a premiare s'echilìbriu de gènere, sa rapresentatividade territoriale e anagràfica, e sa calidade de sa lìtera motivatzionale.

Comente imbiare sa candidadura

Sas dimandas devent lòmpere intro de mesudie de chenàbura su 27 de martzu a s'indiritzu protocollo@parcoditepilora.it. Est netzessàriu a pònnere in còpia su mòdulu de candidadura, unu documentu de identidade e una lìtera motivatzionale non prus longas de 500 paràulas).