S'amministratzione comunale s’est preparende a inaugurare un’editzione noa de s’Estate Siniscolese cun unu programma chi at a animare su territòriu dae su 15 de làmpadas a su 20 de cabudanni de ocannu. S'obietivu printzipale est su de sa valorizatzione de sas traditziones e de s'identidade sarda punnende a fàghere crèschere s'atratividade de una zona chi bantat ammajos costerinos e chirros de intro prenos de istòria. Comente? Promovende atividades culturales, ricreativas e enogastronòmicas. Su bandu est abertu a una platea manna de operadores comente sos assòtzios iscritos a su Runts o a s'albu comunale e sos comitados locales ativos in intro de su tessutu sotziale thiniscolesu. Elencados comente ammissìbiles sos cuntzertos, sos ispetàculos teatrales, sos laboratòrios didàticos, sos cunvegnos literàrios, sas manifestatziones folclorìsticas e àteros apuntamentos de disaogu. Atentzione manna b’at pro sas sagras, cun organizatzione afidada pro intreu a sos comitados de sa Gràssia, de Santu Juanne, de Nostra Sennora de Fàtima, de Santa Luchia e de Capu Cuminu, cun màssimu duos eventos a comitadu. Sa seletzione de sos progetos movet dae critèrios chi prèmiant sa calidade de s'oferta, sa capatzidade organizativa e sa sustenibilidade econòmica. Pro èssere ammissu a su finantziamentu, su progetu devet otènnere nessi 60 puntos. Sas dimandas cherent imbiadas intro de mesudie de su 25 de maju, cunsignadas a manu in Comune o imbiadas via pec (protocollo@pec.comune.siniscola.nu.it) ponende in còpia su pianu econòmicu e sa documentatzione istatutària pedida. Rendicontos intro de su 30 de santandria.
.png)
